ປະຫວັດການເປັນມາ

ປະຫວັດການເປັນມາ ແລະ ການເຕີບໃຫຍ່ຂະຫຍາຍຕົວຂອງວຽກງານອຸດສາຫະກຳ ແລະ ການຄ້າ ແຂວງບໍລິຄຳໄຊ

ດັ່ງ​ທີ່ພວກ​ເຮົາ​ຮູ້​ແລ້ວ​ວ່າ​ຊາວ​ລາວ, ຄົນ​ລາວກຳ​ເນີ​ດ​ເກີດ​ຂື້ນ​ມາ​ໄດ້​ຫຼາຍ​ພັນ​ປີ, ມີ​ວັດທະນະ​ທຳ, ຮີດຄອງ​ປະ​ເພນີ​ອັນ​ດີ​ງາມ​, ​ເປັນ​ຄົນ​ທີ່​ຮັກ​ເຊື້ອ​ແພງ​ຊາດ, ພິລະອາດ​ຫານ, ບໍ່ຍອມ​ຈຳນົນ, ​ເປັນ​ດຸ​ໝັ່ນ​ຂະຫຍັນ​ພຽນ, ມີ​ການ​ເພີ່ມ​ພູນ​ຜະລິດຜົນ ​ແລະ ມີ​ການ​ແລກປ່ຽນ​ຜົນ​ຜະລິດ​ນຳ​ກັນ​ມາ​ແຕ່​ດຶກ​ດຳ​ບັນ, ການ​ເພີ່ມ​ພູນ​ຜົນ​ຜະລິດ ​ແລະ ການ​ແລກປ່ຽນ​ຜົນ​ຜະລິດ​ນັ້ນ, ​ແມ່ນ​ໜໍ່​ແໜງ​ຕົ້ນ​ກຳ​ເນີ​ດຂອງ​ຂະ​ແໜງ​ອຸດສາຫະກຳ ​ແລະ ການ​ຄ້າ, ຊື່​ງ​ເປັນ​ຂະ​ແໜງ​ການ​ເສດຖະກິດ​ໜື່ງ​ໃນ​ໂຄງ​ປະກອບ​ເສດຖະກິດ​ແຫ່ງ​ຊາດ ມີ​ບົດ​ສຳຄັນ​ປະກອບສ່ວນໃນ​ການ​ຫັນປ່ຽນ​ໂຄງ​ປະກອບ​ເສດຖະກິດ, ຈາກ​ກະສິກຳ​ໄປ​ສູ່​ອຸດສາຫະກຳ ​ແລະ ການ​ບໍລິການ, ຊຸກຍູ້​ສົ່ງ​ເສີມ​ການ​ຜະລິດ​ເປັນ​ສິນ​ຄ້າ ​ເພື່ອ​ຊົມ​ໃຊ້​ພາຍ​ໃນ ​ແລະ ສົ່ງ​ອອກຕ່າງປະ​ເທດ ​ເຮັດ​ໃຫ້​ເສດຖະກິດ​ແຫ່ງ​ຊາດ​ກໍ່ຄື​ເສດຖະກິດ​ຂອງ​ແຂວງ​ບໍລິ​ຄຳ​ໄຊ ທັງ​ລະບົບ​ເຄື່ອນ​ໄຫວ​ຢ່າງ​ມີ​ຊີວິດ​ຊີວາ.
ການ​ເຕີບ​ໃຫຍ່​ຂະຫຍາຍຕົວ​ຂອງ​ວຽກ​ງານ​ອຸດສາຫະກຳ ​ແລະ ການ​ຄ້າ ແຂວງບໍລິຄຳໄຊ ກ່ອນ ​ແລະ ພາຍຫຼັງ​ການສະຖາ​ປະນາ ສາທາລະນະລັດ ປະຊາທິປະໄຕ ປະຊາຊົນລາວ ​ເປັນ​ຕົ້ນ​ມາ, ​ສາມາດ​ແບ່ງ​ອອກ​ປັນ 3 ​ໄລຍະ​ຄື:
1.  ​ກ່ອນປີ 1975 ​ແມ່ນໄລຍະບຸກລະດົມ, ຂົນຂວາຍ ແລະ ເຕົ້າໂຮມກຳລັງຕໍ່ສູ້ຕ້ານພວກລ່າເມືອງຂື້ນຝະລັ່ງ ແລະ ພວກຈັກກະພັດອາເມລິກາ ໂດຍແມ່ນພະແນກການຄ້າສະຫະເມືອງ 90 ມີໜ້າທີ່ເຄື່ອນໄຫວຢູ່ແນວຫລັງ ເພື່ອຂົນ ຂວາຍທຸກຮູບແບບການເກັບທ້ອນສະບຽງອາຫານໄປຮັບໃຊ້ກອງກຳລັງຕໍ່ຕ້ານສັດຕູທີ່ເຄື່ອນໄຫວຢູ່ແນວໜ້າ.
2.  ໄລຍະ​ແຕ່​ປີ 1976-1986 ​ແມ່ນໄລຍະ​ສ້າງ​ວັດ​ຖຸ​ປະຖົມ​ປັດ​ໃຈ ຫຼື​ສ້າງ​ໂຄງ​ລ່າງ​ພື້ນຖານ​ວັດ​ຖຸ​ເຕັກ​ນິກ ​ໃນ​ຂະ​ແໜງ​ອຸດສາຫະກຳ ​ແລະ ການ​ຄ້າ​ພາຍ​ໃຕ້​ກົນ​ໄກ​ເສດຖະກິດ​ແບບ​ລວມສູນ.

ພາຍຫລັງທີ່ປະເທດຊາດໄດ້ຮັບການປົດປ່ອຍໃນວັນທີ 2 ທັນວາ 1975 ວຽກງານອຸດສາຫະກຳ ແລະ ການຄ້າ ຂອງ ສປປ ລາວ ເວົ້າລວມ, ເວົ້າສະເພາະແຂວງບໍລິຄຳໄຊ ແມ່ນເລີ່ມ ຈາກຈຸດຕໍ່າສຸດດ້ານອຸດສາຫະກຳປຸງແຕ່ງ, ສ່ວນ ການຄ້າແມ່ນມີສອງລັກສະນະຄື: ການຄ້າທີ່ສືບທອດມາຈາກເຂດປົດປ່ອຍເກົ່າ ທີ່ເປັນເສດຖະກິດທຳມະຊາດ ປະສົມ ປະສານກັບການຄ້າລັດ ທີ່ເຮັດໜ້າທີ່ພາລະທິການເປີກຈ່າຍເປັນຕົ້ນຕໍ ແລະ ການຄ້ານ້ອຍໃນຕົວເມືອງ ທີ່ເປັນການຄ້າ ຂອງຊາວຄ້າຂາຍນ້ອຍ ເປັນສ່ວນໃຫຍ່. ໜ້າທີ່ສະເພາະໜ້າ ແລະ ຮີບດ່ວນໃນໄລຍະນີ້ແມ່ນການປົວແປງບາດແຜ ຂອງ ສົງຄາມ. ນະໂຍບາຍ ລວມຂອງພັກລັດຕໍ່ຂົງເຂດການຄ້າ ແມ່ນການຫັນ ການຄ້ານ້ອຍແບບເອກະເທດ, ເອກະຊົນ, ການຄ້າແບບນາຍທືນ ນ້ອຍ ຊື້ - ຂາຍ ແລະ ຈຳໜ່າຍຢູ່ໜ້າຮ້ານໄປສູ່ການຄ້າ ທີ່ມີການ ຊີ້ນຳ, ນຳພາ ແບບລວມສູນ ແຕ່ສູນກາງຮອດທ້ອງຖີ່ນ, ສະຫະກອນຊື້ - ຂາຍ ແບບຮ້ານຄ້າຂອງລັດ ເຊິ່ງໄດ້ກາຍເປັນຕາໜ່າງການຄ້າ ຕາມແຜນ ການ ເພື່ອສ້າງເປັນວັດຖຸປະຖົມປັດໃຈ ໃຫ້ແກ່ການກ້າວຂື້້ນສູ່ສັງຄົມນິຍົມ.

3.  ໄລຍະ​ແຕ່​ປີ 1986 ຫາ​ປະຈຸ​ບັນ ​ແມ່ນ​ໄລຍະ​ຫັນ​ຈາກ​ຄ້າ​ແບບ​ລວມສູນ ຕາມ​ແຜນການ​ມາ​ເປັນ​ໄລຍະ​ການ​ເປີດ​ກວ້າງ​ຕາມ​ກົນ​ໄກ​ຄຸ້ມ​ຄອງ​ເສດຖະກິດ​ໃໝ່ ​ແລະ ​ເຊື່ອ​ໂຍງ​ເສດຖະກິດ​ກັບ​ຕ່າງປະ​ເທດ.

ອີງຕາມມະຕິຕົກລົງ ຂອງກົມການເມືອງສູນກາງພັກ ສະບັບເລກທີ 03/ກມສພ, ລົງວັນທີ 6 ມີນາ 1984 ຕົກລົງເຫັນດີ ສ້າງຕັ້ງແຂວງບໍລິຄຳໄຊຂື້ນ. ວັນທີ 13-16 ຕຸລາ 1986 ກອງປະຊຸມໃຫຍ່ອົງຄະນະພັກແຂວງ ຄັ້ງທີ I ໄດ້ໄຂຂື້ນຢ່າງເປັນທາງການ ເຊິ່ງມັນໄດ້ເປັນຂີດໝາຍອັນສຳຄັນ ໃຫ້ແກ່ການຂະຫຍາຍຕົວຂອງວຽກງານອຸດສາຫະກຳ ແລະ ການຄ້າ ແຂວງບໍລິຄຳໄຊ ໃນແຕ່ລະໄລຍະ ຄືດັ່ງນີ້:
+           ປີ 1986 - 1990 ອຸດສາຫະກຳ ​ແລະ ຫັດຖະກຳ​ຍັງ​ບໍ່ທັນ​ມີຫຍັງ ​ໄດ້​ນຳ​ໃຊ້​ບັນດາ​ອຸດສາຫະກຳ​ນ້ອຍ​ຂອງ​ງ​ເອກະ​ຊົນ,  ​ໄດ້​ຊຸກຍູ້ ​ແລະ ຂະຫຍາ​ຍມູນ​ເຊື້ອ​ຫັດຖະກຳ​ພື້ນ​ເມືອງ​ຂອງ​ປະຊາຊົນ ​ເພື່ອ​ຮັບ​ໃຊ້​ຊີວິດ​ການ​ເປັນ​ຢູ່​ຂອງ​ເຂົາ​ເຈົ້າ​ເອງ​ເຊັ່ນ: ການ​ປູມ​ອນ-ລ້ຽງ​ມ້ອນ, ຈັກສານ, ປູກ​ຝ້າຍ, ຕໍ່າຫູກ, ທໍ່​ໄໝ, ຕີ​ເຫຼັກ, ປັ້ນ​ໝໍ້, ຫຼໍ່ໝາກສົບ​​ໄຖ, ຊ່າງ​ໄມ້, ຊ່າງ​  ຫວາ​ຍ ​ແລະ ອື່ນໆ.ໄດ້​ເອົາ​ໃຈ​ໃສ່ ແລະ ​ຂະຫຍາຍ​ຕາໜ່າງການ​ຄ້າ​ຂອງ​ລັດ​ ລົງຮອດທຸກເມືອງເພື່ອ​ເຮັດ​ໜ້າ​ທີ່​ຂາຍ ​ແລະ ​ເກັບ​ຊື້ ​ແລກປ່ຽນ​ສິນຄ້າ​ກະສິກຳ ​ແລະ ​ເຄື່ອງ​ນາຂອງປ່າ, ປັບປຸງ​ຮ້ານ​ຄ້າ ​ແລະ ສະຫະກອນ​ລວມໝູ່​ຂອງ​ປະຊາຊົນ. ຈຳກັດດັດ​ສ້າງ​ບັນດາ​ການ​ຄ້າ​ທີ່​ບໍ່ສອດ​ຄ່ອງ ກັບ​ແນວທາງ​ນະ​ໂຍບາບ​ຂອງ​ພັກ-ລັດ ​ແລະ ຄຸ້ມ​ຄອງ​ຕະຫຼາດ ​ປະຕິບັດ​ການ​ພົວພັນ​ສອງ​ສົ້ນ ທົ່ວແຂວງມີ: ຮ້ານ​ຄ້າ​ເມືອງ 06 ​ແຫ່ງ, ໜ່ວຍ​ເກັບ​ຊື້ຊົນນະບົດ 27 ​ໜ່ວຍ, ມີ​ສະຫະກອນ​ຊື້-ຂາຍ 07 ໜ່ວຍ​, ຕະຫຼາດ​ຊົນນະບົດ 7 ​ແຫ່ງ.
+           ປີ 1990 - 1993 ອຸດສາຫະກຳ ​ແລະ ຫັດ​ຖະກຳ​ປຸງ​ແຕ່ງ ມີ​ການ​ຂະຫຍາຍຕົວ ​ເທດສະບານ​ແຂວງ​ ​ໄດ້​ນຳ​ໃຊ້​ກະ​ແສ​ໄຟຟ້າ​ດ້ວຍເຄື່ອງຈັກ​. ມີໂຮງງານເຕົາດິນ​ຈີ່ 08 ​ແຫ່ງ, ​ໂຮງ​ເລື່ອຍ 05 ​ແຫ່ງ, ​ໂຮງ​ຊອຍ​ເຟີ​ນີ​ເຈີ 06 ​ແຫ່ງ, ຫັດຖະກຳ-ຕໍ່າ​ຫູກ​ທໍ່​ໄໝໄດ້​ຮັບ​ການ​ສົ່ງ​ເສີມ.
ດ້ານ​ການ​ຄ້າ ​ແລະ ການ​ບໍລິການ​, ຕະຫຼາດ​ກໍ່​ໄດ້​ມີ​ການ​ຂະຫຍາຍຕົວ​ໄປ​ສູ່​ຊົນນະ​ບົດ ​ແລະ ພູດ​ອຍ, ຮ້ານ​ຂາຍຍ່ອຍ 1.007 ຮ້ານ ​ເພີ່ມ​ຂື້ນ 72,17%. ການ​ບໍ​ລິການທ່ອງທ່ຽວ​ພາຍ​ໃນ​ແຂວງ​ ກໍ່​ໄດ້​ມີ​ໝໍ່​ແໜງ​ເປັນ​ຕົ້ນ: ວັດ​ພະ​ບາດ​ໂພນ​ສັນ, ຕາດ​ເລິກ ​ເມືອງ​ທ່າ​ພະ​ບາດ, ວັດ​ດານ, ຖ້ຳ​ແກບ ​ເມືອງ​ປາກ​ຊັນ, ​ເຂດ​ຫຼັກ​ຊາວ ​ເມືອງ​ຄຳ​ເກີດ.
+           ປີ 1993 - 1998 ໄດ້​ຕັ້ງໜ້າ​ນຳ​ໃຊ້​ທ່າ​ແຮງ​ທຸກ​ພາກສວ່ນ​ເສດຖະກິດ ​ເພື່ອ​ຊຸກຍູ້​ການ​ຜະລິດ, ປຸກລະດົມ​ຂົນຂວາຍ​ການ​ລົງທຶນ​ຂອງ​ພໍ່ຄ້າ, ​ຊາວ​ຂາຍ ​ເຂົ້າ​ໃນການ​ຕະຫຼາດ ​ແລະ ຈໍລະ​ຈອນ​ສິນ​ຄ້າ ອອກ​ສູ່​ຊົນນະບົດ​ໄດ້ 90% ຂອງ​ຈຳນວນ​ບ້ານ ​ເຮັດ​ໃຫ້​ຊີ​ວິດ​ການ​ເປັນ​ຢູ່​ຂອງ​ພໍ່​ແມ່​ປະຊາຊົນ​ນັບ​ມື້​ນັບ​ດີ​ຂື້ນ. ສິນຄ້າ​ຂາ​ອອກ​ໄດ້​ເພີ່ມ​ຂື້ນ 29%, ສິນຄ້າ​ຂາ​ເຂົ້າ​ຫຼຸດ​ລົງ 42% ​ໄດ້​ສຳ​ຫຼວດ​ເກັບ​ກຳ​ຂໍ້​ມູນ​ແຫຼ່ງທ່ອງ​ທ່ຽວ​ທຳ​ມະ​ຊາດ ​ແລະ ວັດທະນະທຳ​ຈຳນວນ​ໜື່ງ ມີ​ນັກ​ທ່ອງ​ທ່ຽວ​ເຂົ້າ​ມາ​ຈຳນວນ 13.152 ຄົນ.
+           ປີ 1998 - 2005 ຕາໜ່າງການ​ຄ້າ ກໍ່​ໄດ້ມີ​ການ​ຂະຫຍາຍຕົ​ວອອກ​ສູ່​ຊົນນະບົດ, ຫຼາຍ​ກຸ່ມເຫັນໄດ້ມີຕະ ຫຼາດຢູ່ໃຈກາງບ້ານ. ໄດ້ສຸມໃສ່ປັບປຸງຂອດບໍລິການຕາມດ່ານເຂົ້າ-ອອກ, ຊຸກຍູ້ສົ່ງເສີມການຜະລິດສິນຄ້າຮັບໃຊ້ພາຍ ໃນ ແລະ ສົ່ງອອກ, ຈຳກັດການນຳເຂົ້າສິນຄ້າທີ່ສາມາດຜະລິດໄດ້. ສິນຄ້າຂາເຂົ້າຊົມໃຊ້ພາຍໃນຫລຸດລົງ 17%, ມູນຄ່ ສິນຄ້າຂາອອກ ແຕ່ລະປີບໍ່ໃຫ້ຫຼຸດ 4 ລ້ານກວ່າໂດລາ.  ສິນຄ້າຜ່ານໂດຍສະເລ່ຍ 25 ລ້ານໂດລາຕໍ່ປີ. ຖ້າຄິດໄລ່ຂາ ອອກ-ຂາເຂົ້າ ທັງໝົດພວກເຮົາຍັງດູນຢູ່ 22%, ເປີດກວ້າງການທ່ອງທ່ຽວຢູ່ພາຍໃນແຂວງ ແລະ ໄດ້ສົມທົບກັບອົງ ການທ່ອງທ່ຽວ ໂຄສະນາ, ດຶງດູດນັກທ່ອງທ່ຽວເຂົ້າມາ ແລະ ຜ່ານໄປປະເທດທີ 3 ເພີ່ມຂື້ນ 2 ເທົ່າ, ຮ່ວມມືກັບ ຫວຽດນາມ, ໄທ ສົ່ງເສີມການທ່ອງທ່ຽວຂອງບັນດາແຂວງ ຂອງ 3 ປະເທດທີ່ນຳໃຊ້ເສັ້ນທາງ ເລກ 8 A.
+           ປີ 2006 - 2010 ພື້ນຖານອຸດສາຫະກຳ - ການຄ້າ ໄດ້ຮັບການປັບປຸງ, ຍົກລະດັບ ແລະ ຂະຫຍາຍຕົວ ໄປຕາມທິດທີ່ກຳນົດໄວ້ເຊັ່ນ: ໂຮງງານປຸງແຕ່ງໄມ້, ເຟີນີເຈີ, ຕົ້ມກັ່ນຫົວນໍ້າຫອມ, ຫລອມເຫຼັກເສດ, ໂຮງງານປະ ກອບເຄື່ອງ ໃຊ້ໄຟຟ້າ ແລະ ອື່ນໆ. ຜະລິດຕະພັຫັດຖະກຳ ທີ່ເປັນມູນເຊື້ອຂອງປະຊາຊົນ ກໍ່ໄດ້ຮັບການສົ່ງເສີມດີຂື້ນ, ຫລາຍບ້ານມີຜະລິດຕະພັນເປັນຂອງຕົນເອງ; ຕາໜ່າງການຄ້າ ໄດ້ຂະຫຍາຍເຖິງທຸກບ້ານ ແລະ ບ້ານໃຫຍ່ມີຕະຫລາດ; ປັບປຸງຂອດບໍລິການສິນຄ້າຜ່ານ ແລະ ສົ່ງອອກ, ສົ່ງເສີມການຜະລິດສິນຄ້າຂອງປປະຊາຊົນເພື່ອຊົມໃຊ້ພາຍໃນ ແລະ ສົ່ງ ອອກ, ເຊິ່ງມູນຄ່າ ສົ່ງອອກແຕ່ລະປີບໍ່ຫລຸດ 4,5 ລ້ານໂດລາ, ສິນຄ້າຜ່ານແດນສະເລ່ຍ 20 ລ້ານກວ່າໂດລາ.
+           ປີ 2011 – 2015 ໄດ້ເອົາໃຈໃສ່ດັດສົມໂຮງງານ ແລະ ສົ່ງເສີມວິສາຫະກິດຂະໜາດນ້ອຍ, ຂະໜາດກາງ; ຫັດຖະກຳຈັກສານ ແລະ ຕໍາຫູກ ທີ່ເປັນມູນເຊື້ອຂອງປະຊາຊົນ ໃຫ້ກາຍເປັນຫົວໜ່ວຍທີ່ເຂັ້ມແຂງ. ຕາໜ່າງການຄ້າ ໄດ້ມີການຂະຫາຍຕົວສູ່ບັນດາບ້ານ ແລະ ກຸ່ມບ້ານ. ການຄຸ້ມຄອງວິສາຫະກິດ ແລະ ການນຳເຂົ້າ - ສົ່ງອອກ ສິນຄ້າກໍ່ ໄດ້ດຳເນີນໄປຕາມລະບຽບ, ກົດໝາຍທີ່ວາງອອກ ດັ່ງລາຍລະອຽດລຸ່ມນີ້:
-  ປະຈຸບັນ ທົ່ວແຂວງບໍລິຄຳໄຊ ມີຕະຫລາດທັງໝົດ 30 ແຫ່ງ, ໃນນັ້ນ, ຕະຫລາດກາງ ມີ 2 ແຫ່ງ, ນ້ອຍ 09 ແຫ່ງ ແລະ ຕະຫລາດຊຸມຊົນ 19 ແຫ່ງ. ໃນສົກປີ 2014 – 2015 ມູນຄ່າການຈໍລະຈອນ ຂາຍຍົກ 495,223 ຕື້ ກີບ, ຂາຍຍ່ອຍ 771, 142 ຕື້ກີບ ແລະ ມູນຄ່າເກັບຊື້ຜະລິດຕະພັນທົ່ວແຂວງ 139,576 ຕື້ກີບ.
-  ຈຳນວນຫົວໜ່ວຍທຸລະກິດທີ່ໄດ້ຂື້ນທະບຽນວິສາຫະກິດ (ເລີ່ມແຕ່ຈັດຕັ້ງກົດໝາຍວ່າດ້ວຍວິສາຫະກິດ ໃນປີ 2008 ເປັນຕົ້ນມາ) ມີທັງໝົດ 3.644 ຫົວໜ່ວຍ, ເປັນທຶນຈົດທະບຽນ 1.627.117.324.600 ກີບ. ໃນນັ້ນ, ວິສາຫະກິດ ສ່ວນບຸກຄົນກວມເອົາ 92,26%, ບໍລິສັດຈຳກັດຜູ້ດຽວ 6,29%, ບໍລິສັດຈຳກັດ 1,18%, ບໍລິສັດລັດ 0,08%,  ວິສາຫະກິດຫຸ້ນສ່ວນສາມັນ 0,05% ແລະ ວິສາຫະກິດຫຸ້ນສ່ວນຈຳກັດ 0,03%.
-  ການຂະຫຍາຍຕົວດ້ານອຸດສາຫະກຳປຸງແຕ່ງ ແລະ ຫັດຖະກຳ ເຊິງຈຳນວນໂຮງງານໃນທົ່ວແຂວງມີທັງໝົດ 2135 ແຫ່ງ, ໃນນັ້ນ, ໂຮງງານຂະໜາດໃຫຍ່ ມີ 53 ແຫ່ງ, ກາງ 41 ແຫ່ງ ແລະ ນ້ອຍ 2041 ແຫ່ງ. ລວມຍອດມູນ ຄ່າຜະລິດຕະພັນອຸດສາຫະກຳ ທັງໝົດແມ່ນ 918.366.807.000 ກີບ.
-  ມູນຄ່າການນຳເຂົ້າ, ສົ່ງອອກ ແລະ ຜ່ານແດນມີຄືດັ່ງນີ້:
+  ມູນຄ່າການສົ່ງອອກ ບັນລຸໄດ້ 27,24 ລ້ານໂດລາ. ໃນນັ້ນ, ສິນຄ້າສົ່ງອອກຕົ້ນຕໍແມ່ນຜະລິດຕະພັນ ໄມ້, ມັນຕົ້ນ, ສາລີ, ເຄື່ອງປ່າຂອງດົງ.
+  ມູນຄ່າສິນຄ້ານຳເຂົ້າ ບັນລຸໄດ້ 10,38 ລ້ານໂດລາ. ໃນນັ້ນ, ສິນຄ້ານຳເຂົ້າຕົ້ນຕໍແມ່ນ ເຄື່ອງກິນ, ເຄື່ອງໃຊ້ສອຍປະຈຳວັນ, ເຄື່ອງກໍ່ສ້າງ, ເຄື່ອງໃຊ້ໄຟຟ້າ.
+  ມູນຄ່າສິນຄ້າຜ່ານແດນ ບັນລຸໄດ້ 18,7 ລ້ານໂດລາ.

40 ປີ​ແຫ່ງ​ການ​ກຳ​ເນີ​ດ ​ແລະ ​ເຕີບ​ໃຫຍ່​ຂະຫຍາຍຕົວ​ຂອງ​ວຽກ​ງານ​ອຸດສາຫະກຳ ​ແລະ ການ​ຄ້າ ​ແຂວງ​ບໍລິ​ຄຳ​ໄຊ. ​ເຊີ່ງ​ຍາມ​ໃດ​ກໍ່ກຳ​ແໜ້ນ​ແນວທາງ ​ແລະ ຮັບ​ໃຊ້​ໜ້າ​ທີ່​ການ​ເມືອງ​ຂອງ​ແຂວງ​ກໍ່ຄື​ຂອງ​ພັກ ​ແລະ ລັດຖະບານ ​ໃນ​ແຕ່ລະ​ໄລຍະ​ ນັບ​ແຕ່ກ່ອນ​ປົດ​ປ່ອຍ​ມາ​ເຖິງ​ປະຈຸ​ບັນ ​ວິວັດທະນາ​ການ​ທາງ​ດ້ານ​ວົງ​ຈອນ​ການຈັດ​ຕັ້ງ ຂອງ ​ພະ​ແນ​ກອຸດ ສາຫະກຳ ​ແລະ ການ​ຄ້າ​ ໄດ້​ມີ​ການ​ປ່ຽນ​ແປງ​ຄືດັ່ງນີ້:

ໄລຍະ
ຊື່ພະແນກ
ຄະນະພະແນກ
1961 - 1971
ພະແນກການຄ້າ ສະຫະເມືອງ 90
ທ່ານ ໄມຄຳດີ ອິນທະວົງ
ຫົວໜ້າພະແນກ
1986 - 1993
ພະແນກເສດຖະກິດ
ທ່ານ ບົວແກ້ວ ໄຊມູນວົງ
ຫົວໜ້າພະແນກ
1993 - 1995
ພະແນກການຄ້າ
ທ່ານ ສູນທອນ ລັດຕະວົງສາ
ຫົວໜ້າພະແນກ
ທ່ານ ສົມລິດສາ ພົມມະຈັນ
ຮອງ

1995 – 2002

ພະແນກການຄ້າ
ທ່ານ ບຸນທຽນ ແກ້ວສີພາ
ຫົວໜ້າພະແນກ
ທ່ານ ສຳລີ ປັນຍານຸວົງ
ຮອງ
ທ່ານ ພູລຳພັນ ທ່ຽງລະໄມ
ຮອງ

2002 - 2004

ພະແນກການຄ້າ ແລະ ທ່ອງທ່ຽວ
ທ່ານ ດຣ ສຸວັນນີ ໄຊຊະນະ
ຫົວໜ້າພະແນກ
ທ່ານ ພູລຳພັນ ທ່ຽງລະໄມ
ຮອງ
ທ່ານ ອູ່ທອງ ຈັນທະວົງ
ຮອງ
ທ່ານ ທອງສີ ໄຊຍະຈັກ
ຮອງ

2006 - 2010

ພະແນກອຸດສາຫະກຳ ແລະ ການຄ້າ
ທ່ານ ບົວຈັນ ບຸນວົງໄຊ
ຫົວໜ້າພະແນກ
ທ່ານ ພູລຳພັນ ທ່ຽງລະໄມ
ຮອງ
ທ່ານ ສະຫວນ ສະຫ່ວາງ
ຮອງ

2010 – ປະຈຸບັນ

ພະແນກອຸດສາຫະກຳ ແລະ ການຄ້າ
ທ່ານ ສະຫວນ ສະຫ່ວາງ
ຫົວໜ້າພະແນກ
ທ່ານ ອຸດອນ ຄຳພຽນ
ຮອງ
ທ່ານ ພັກສົມດີ ວົງສາວັນດີ
ຮອງ
ທ່ານ ແສງອາລຸນ ແສງອາພອນ
ຮອງ

ໂຄງປະກອບກົງຈັດອົງການຈັດຕັ້ງຂອງພະແນກອຸດສາຫະກຳ ແລະ ການຄ້າ ໃນປະຈຸບັນ

1. ຫ້ອງການບໍລິຫານ
6. ຂະແໜງສົ່ງເສີມ ແລະ ພັດທະນາສິນຄ້າ
2. ຂະແໜງການຄ້າພາຍໃນ
7. ຂະແໜງກວດກາລັດ
3. ຂະແໜງຄຸ້ມຄອງການນຳເຂົ້າ - ສົ່ງອອກ
8. ຂະແໜງແຜນການ ແລະ ສະຖິຕິ
4. ຂະແໜງອຸດສາຫະກຳ ແລະ ຫັດຖະກຳ
9. ຫ້ອງການອຸດສາຫະກຳ ແລະ ການຄ້າ 7 ເມືອງ
5.  ຂະແໜງທະບຽນ ແລະ ຄຸ້ມຄອງວິສາຫະກິດ

ໄປພ້ອມກັບການຂະຫຍາຍຕົວທາງດ້ານກົງຈັກການຈັດຕັ້ງ ຈຳນວນພະນັກງານ - ລັດຖະກອນຂະແໜງອຸດສາ ຫະກຳ ແລະ ການຄ້າ ແຂວງບໍລິຄຳໄຊກໍ່ໄດ້ມີການເຕີບໃຫ່ຍເຂັ້ມແຂງທາງດ້ານປະລິມານ ແລະ ຄຸນນະພາບອັນໄດ້ ເປັນພື້ນຖານທີ່ສຳຄັນແກ່ການເຮັດສຳເລັດໜ້າທີ່ການເມືອງຂອງແຂວງໃນໄລຍະໃໝ່. ປະຈຸບັນ, ຂະແໜງອຸດສາຫະກຳ ແລະ ການຄ້າ ແຂວງບໍລະຄຳໄຊ ມີພະນັກງານ - ລັດຖະກອນ ທັງໝົດ 140 ຄົນ, ຍິງ 40 ຄົນ, ສັງກັດຂັ້ນພະແນກ 73 ຄົນ, ຍິງ 27 ຄົນ, ຂັ້ນເມືອງ 67 ຄົນ, ຍິງ 13 ຄົນ. ລະດັບວິຊາສະເພາະ ຊັ້ນປະລິນຍາໂທ 15 ຄົນ, ປະລີນຍາຕີ 94 ຄົນ, ຊັ້ນສູງ 28 ຄົນ ແລະ ຊັ້ນກາງ 03 ຄົນ.
          ຄຽງຄູ່ກັບຜົນສຳເລັດທີ່ກ່າວມາຂ້າງເທິງນັ້ນ, ພວກເຮົາຍັງເຫັນໄດ້ວ່າເສັ້ນທາງກ້າວໄປທາງໜ້າຍັງ ຈະປະເຊີນ ກັບອຸປະສັກຫລາຍຢ່າງ ເປັນຕົ້ນ, ການພັດທະນາເສດຖະກິດ - ສັງຄົມຂອງແຂວງຂະຫຍາຍຕົວຢູ່ໃນລະດັບຕໍ່າ, ພື້ນ ຖານໂຄງລ່າງ, ພື້ນຖານການຜະລິດປຸງແຕ່ງຍັງມີໜ້ອຍ.
ການໄດ້ເຂົ້າເປັນສະມາຊິກ ອົງການການຄ້າໂລກ (WTO) ໃນຕົ້ນປີ 2013 ບໍ່ວ່າຈະເປັນການຈັດຕັ້ງປະຕິບັດບັນດາພັນທະ, ສັນຍາຕ່າງໆ ແລະ ສີ່ງທ້າທາຍໃນການເຂົ້າເປັນປະຊາຄົມເສດຖະກິດອາ ຊຽນ ໃນທ້າຍປີ 2015 ທີ່ຈະມາເຖິງນີ້.

          ຜົນງານຂອງຂະແໜງອຸດສາຫະກຳ ແລະ ການຄ້າ ແຂວງບໍລິຄຳໄຊ ທີ່ຍາດມາໄດ້ໃນໄລຍະ 40 ປີຜ່ານມາ ໄດ້ເປັນການຢັ້ງຢືນເຖິງຄວາມຖຶກຕ້ອງ ແລະ ສອດຄ່ອງກັບແນວທາງປ່ຽນແປງໃໝ່ຂອງພັກ ມັນແມ່ນໝາກຜົນແຫ່ງການຊີ້ນຳນຳພາເປັນເອກະພາບ ແລະ ສະຫຼາດສ່ອງໃສຂອງບັນດາການນຳລຸ້ນຕ່າງໆ ແລະ ແມ່ນໝາກຜົນແຫ່ງຄວາມ ສາມັກຄີເປັນຈິດໜື່ງໃຈດຽວ, ຄວາມເອົາໃຈໃສ່ ແລະ ການທຸ່ມເຮື່ອເທແຮງ, ສະຕິປັນຍາ, ນຳ້ໃຊເສຍສະຫຼະ ເພື່ອຜົນ ປະໂຫຍດສ່ວນລວມຂອງຖັນແຖວພະນັກງານ, ລັດຖະກອນ, ກຳມະກອນ ລວມໄປເຖິງການປະກອບສ່ວນ ຢ່າງ ບໍ່ຮູ້ອິດ ຮູ້ເມື່ອຍ ຂອງບັນດາພາກສ່ວນຜູ້ປະກອບການທຸລະກິດ, ການປະສານງານຂອງບັນດາຂະແໜງການທີ່ກ່ຽວຂ້ອງ ລວມ ໄປເຖິງການຊ່ວຍເຫຼືອ ສະນັບສະໜູນຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆເຊີ່ງໄດ້ເປັນ ພື້ນ ຖານອັນສຳຄັນໃນການນຳພາປະເທດຊາດ ເວົ້າລວມ, ເວົ້າສະເພາະຂອງ​ແຂວງ ກໍ່ຄືຂະແໜງອຸດສາຫະກຳ ແລະ ການ ຄ້າແຂວງບໍລິຄຳໄຊ ກ້າວໄປທາງໜ້າຢ່າງບໍ່ຢຸດຢັ້ງ, ບົນເສັ້ນທາງກ້າວເດີນສູ່ຄວາມຮຸ່ງເຮືອງສີວິໄລ ພາຍ​ໄຕ້ຄັນທຸງຂອງ​ພັກ ແລະ ແສງສະຫວ່າງຂອງມະຕິກອງປະຊຸມໃຫ່ຍຂອງພັກປະຊາຊົນປະຕິວັດລາວ.

ສັງລວມ ແລະ ຮຽບຮຽງໂດຍ:
 ຂະແໜງແຜນການ -  ສະຖິຕິ
ພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ

No comments:

Post a Comment