January 28, 2019

ພະແນກອຸດສາຫະກຳ ແລະ ການຄ້າຈັດພິທີປະຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ


           ໃນເວລາ 8:30 ໂມງ ຂອງວັນ 24 ມັງກອນ 2019. ພະແນກອຸດສາຫະກຳ ແລະ ການຄ້າ ແຂວງ ບໍລິຄຳໄຊ. ໄດ້ຈັດພິທີ ປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949-20ມັງກອນ 2019).   
        ໄປຄຽງຄູ່ກັບ ການສ້າງຂະບວນການ ສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949-20ມັງກອນ 2019) ໃນທົ່ວປະເທດເວົ້າລວມ ເວົ້າສະເພາະ ແຂວງບໍລິຄໍາໄຊ. ພະແນກອຸດສາຫະກຳ ແລະ ການຄ້າ ແຂວງ ບໍລິຄຳໄຊ ໄດ້ຈັດຕັ້ງພິທີ ປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949-20ມັງກອນ 2019) ຂື້ນ ທີ່ຫ້ອງປະຊຸມຂອງພະແນກອຸດສາຫະກຳ ແລະ ການຄ້າ ແຂວງ ບໍລິຄຳໄຊ.ໂດຍເປັນປະທານ ແລະ ປາຖະກະຖາ ຂອງ  ທ່ານ ພັກສົມດີ ວົງສາວັນດີ  ຮອງຫົວໜ້າພະແນກອຸດສາຫະກໍາ ແລະ ການຄ້າ. ມີບັນດາຄະນະພັກ, ຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານ - ລັດຖະກອນ ພາຍໃນພະແນກ ໄດ້ເຂົ້າຮ່ວມຢ່າງພ້ອມພຽງ.



          ເພື່ອເປັນການຫວນຄືນ ປະຫວັດການກໍາເນີດ ແລະ ມູນເຊື້ອວິລະກໍາ ຂອງກອງທັບປະຊາຊົນລາວ. ຊຶ່ງ ນັບແຕ່ທ້າຍສະຕະວັດທີ XIX ເປັນຕົ້ນມາ ປະເທດລາວໄດ້ຕົກເປັນຫົວເມືອງຂຶ້ນຂອງຈັກກະພັດຕ່າງດ້າວ ປະຊາຊົນລາວ ໄດ້ຖືກກົດຂີ່ຂູດຮີດຢ່າງໜັກໜ່ວງ ແລະ ສູນເສຍຄວາມເປັນເອກະລາດແຫ່ງຊາດ, ຄວາມເປັນເຈົ້າຕົນເອງ, ຈາກເຫດການດັ່ງກ່າວ ປະຊາຊົນລາວບັນດາເຜົ່າຜູ້ຮັກຊາດ ໄດ້ສາມັກຄີເດັດດ່ຽວລຸກຂຶ້ນຕໍ່ສູ້ຕ້ານກັບຈັກກະພັດຝຣັ່ງ ແລະ ລູກແຫຼ້ງຕີນມືຂອງພວກມັນດ້ວຍຫຼາຍຮູບການ, ຫຼາຍລະດັບກ້າວໄປເຖິງການຕໍ່ສູ້ດ້ວຍກໍາລັງປະກອບອາວຸດຢ່າງອົງອາດກ້າຫານ ແລະ ເປັນຂະບວນການກ້ວາງຂວາງ ພາຍໃຕ້ການນໍາພາຂອງເຈົ້າກົກເຈົ້າເຫຼົ່າຢູ່ແຕ່ລະທ້ອງຖິ່ນ ແຕ່ຂະບວນການຕໍ່ສູ້ເຫຼົ່ານັ້ນບໍ່ໄດ້ຮັບໄຊຊະນະ.
ພາຍຫຼັງທີ່ ພັກກອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ  ວັນທີ 3 ກຸມພາ 1930 ໂດຍແມ່ນປະທານໂຮ່ຈິມິນ ເປັນຜູ້ນໍາພາ ການປະຕິວັດຂອງປະຊາຊົນ 3 ຊາດອິນດູຈີນ ຈຶ່ງເຮັດໃຫ້ການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຂອງປະຊາຊົນ 3 ຊາດອິນດູຈີນ ນັບມື້ນັບແຂງແຮງ ແລະ ໄດ້ຮັບໄຊຊະນະຢ່າງຕໍ່ເນື່ອງ. ຍ້ອນສະພາບການດັ່ງກ່າວ ກໍຄືຂະບວນການປະຕິວັດຕໍ່ສູ້ກູ້ຊາດ ຂອງປະຊາຊົນລາວບັນດາເຜົ່າຜູ້ຮັກຊາດ ເຕີບໃຫຍ່ຂະຫຍາຍຕົວ ກອງທັບປະຊາຊົນລາວ ຈຶ່ງໄດ້ຮັບການສ້າງຕັ້ງຂຶ້ນໃນວັນທີ 20 ມັງ ກອນ 1949.
ຜ່ານຂະບວນການຕໍ່ສູ້ກູ້ຊາດ ຕ້ານການຮຸກຮານຂອງພວກຈັກກະພັດຝຣັ່ງ, ຈັກກະພັດອາເມລິກາ ເປັນແຕ່ລະໄລຍະ ພາຍໃຕ້ການນໍາພາອັນປີຊາສາມາດ ສະຫຼາດສ່ອງໃສຂອງພັກປະຊາຊົນ ປະຕິວັດລາວ ກອງທັບປະຊາຊົນລາວ ໄດ້ຜ່ານຜ່າອຸປະສັກນາໆປະການ, ບໍ່ຈັກວ່າເທົ່າໃດ ແລະ ເຕັມໄປດ້ວຍການເສຍສະຫຼະອັນໃຫຍ່ຫຼວງ ໃນພາລະກິດຕໍ່ສູ້ປົດປ່ອຍປະເທດຊາດ, ເຮັດສໍາເລັດພາລະກໍາປະເທດຊາດ ທີ່ພັກ ແລະ ປະຊາຊົນມອບໝາຍໃຫ້ຢ່າງມີໄຊ, ສາມາດຕີເອົາຊະນະຈັກກະພັດລ່າເມືອງຂຶ້ນຝຣັ່ງ, ຈັກກະພັດອາເມລິກາ ຜູ້ຮຸກຮານ ພ້ອມດ້ວຍລູກແຫຼ່ງຕີນມືຂອງພວກເຂົາ ປົດປ່ອຍປະເທດຊາດໄດ້ຢ່າງສົມບູນ, ສະຖາປະນາ ເປັນປະເທດ ສປປ ລາວ ໃນວັນທີ 2 ທັນວາ 1975 ໄດ້ຢ່າງສະຫງ່າຜ່າເຜີຍ. ໃນຂະບວນການຕໍ່ສູ້ກູ້ຊາດ ແລະ ພາລະກິດການປະຕິວັດ ຊຶ່ງໄດ້ມີເຫດການປະຫວັດສາດທີ່ສໍາຄັນ ເຊັ່ນ:
-       ການຜ່າວົງປິດລ້ອມຂອງກອງພັນທີ 2 ຂອງຝ່າຍປະເທດລາວ ຢູ່ທົ່ງໄຫຫີນ-ຊຽງຂວາງ.
-       ຜູ້ນໍາແນວລາວຮັກຊາດ ໂຕນອອກຈາກຄຸກໂພນເຄັງ.
ມີ 5 ບັ້ນຮົບໃຫຍ່ ທີ່ເປັນປະຫວັດສາດ ຄື:
-       ບັ້ນຮົບປົດປ່ອຍຫຼວງນໍ້າທາ (6/5/1962)
-       ບັ້ນຮົບນໍ້າບາກ (27/1/1968).
-       ບັ້ນຮົບຜາຖີ່ (13/3/1968).
-       ບັ້ນຮົບກູ້ກຽດ (ບັ້ນຮົບ 139 ປົດປ່ອຍທົ່ງໄຫຫີນຊຽງຂວາງ) (25/12/1969-25/4/1971).
-       ບັ້ນຮົມລາມເຊີນ 719 (8/2-23/3/1971).
ເພື່ອເຮັດສໍາເລັດໜ້າທີ່ອັນໜັກໜ່ວງ ແລະ ມີກຽດສະຫງ່າ ທີ່ປະເທດຊາດ ແລະ ປະຊາຊົນມອບ    ໝາຍໃຫ້ ບັນດາພະນັກງານ-ນັກຮົບ, ນາຍ ແລະ ພົນທະຫານ ໃນທົ່ວກອງທັບ ເຮົາຈົ່ງອອກແຮງເສີມຂະຫຍາຍທາດແທ້, ມູນເຊື້ອຂອງຊາດ ແລະ ຂອງກອງທັບ, ເດັດດ່ຽວປະຕິບັດແນວທາງປ່ຽນແປງໃໝ່ຮອບດ້ານ ຢ່າງມີຫຼັກການຂອງພັກ, ເສີມຂະຫຍາຍບົດບາດ ເປັນກໍາລັງຫຼັກແກ່ນສານ ໃນການຈັດຕັ້ງປະຕິບັດ ສອງໜ້າທີ່ຍຸດທະສາດ ໃນໄລຍະໃໝ່ທີ່ວາງອອກ ຄື ປົກປັກຮັກສາ ແລະ ສ້າງສາພັດທະນາປະເທດຊາດ. ດັ່ງຄໍາເວົ້າ ຂອງປະທານ ໄກສອນ ພົມວິຫານ ເວົ້າວ່າ: ເວລາໃດກອງທັບກໍ່ນໍາໜ້າທຸກວຽກງານ, ເດັດດ່ຽວໜຽວແໜ້ນຜ່ານຜ່າອຸປະສັກ, ສໍາເລັດທຸກໜ້າທີ່ ຕີເອົາຊະນະສັດຕູທຸກໂຕ, ສົມແລ້ວເປັນກໍາລັງແກ່ນສານທີ່ເຂັ້ມແຂງ ຂອງການປະຕິວັດ, ເປັນເຄື່ອງມືອັນແຫຼມຄົມຂອງພັກ”.
          ພະແນກອຸດສາຫະກໍາ ແລະ ການຄ້າແຂວງບໍລິຄໍາໄຊ ໄດ້ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ ສະມາຊິກພັກ-ພະນັກງານ ພາຍໃນພະແນກ ກໍາແໜ້ນແນວທາງນະໂຍບາຍຂອງພັກ, ຮໍ່າຮຽນເອົາມູນເຊື້ອອັນສະຫງ່າງາມ ຂອງພັກປະຊາຊົນປະຕິວັດລາວ ເພື່ອພ້ອມກັນສືບທອດ ພາລະກິດ ໜ້າທີ່ການເມືອງຂອງຕົນໃຫ້ມີຜົນສໍາເລັດ.
 ກອງປະຊຸມໄດ້ດໍາເນີນເປັນເວລາ 1 ຕອນ ແລະ ໄດ້ສີ້ນສຸດລົງໃນວັນດຽວກັນ.

No comments:

Post a Comment