September 18, 2018


ໃນວັນທີ 12 ກັນຍາ 2018 ພະແນກ ອຸດສາຫະກໍາ ແລະ ການຄ້າແຂວງບໍລິຄໍາໄຊ ໄດ້ຈັດກອງປະຊຸມ ເຜີຍແຜ່ມະຕິກອງປະຊຸມເປີດກວ້າງຄົບຄະນະບໍລິຫານງານພັກແຂວງ ຄັ້ງທີ່ 10 ສະ
ໃໝທີ່ VI ແລະ ໄດ້ເຜີແຜ່ນິຕິກໍາຈຳນວນໜື່ງທີ່ຈະຕ້ອງໄດ້ນໍາໄປປະຕິບັດ. ໂດຍການເປັນປະທານ ຂອງ  ທ່ານ ແສງອາລຸນ ແສງອາພອນ ຫົວໜ້າພະແນກອຸດສາຫະກໍາ ແລະ ການຄ້າ. ມີບັນດາຮອງພະແນກ, ຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານ - ລັດຖະກອນ ພາຍໃນພະແນກ ໄດ້ເຂົ້າຮ່ວມຢ່າງພ້ອມພຽງ.
ໃນກອງປະຊຸມຄັ້ງນີ້, ທ່ານຫົວໜ້າພະແນກອຸດສາຫະກໍາ ແລະ ການຄ້າແຂວງ ໄດ້ເຜີຍແຜ່ມະຕິມະຕິກອງປະຊຸມເປີດກວ້າງຄົບຄະນະບໍລິຫານງານພັກແຂວງ ຄັ້ງທີ 10 ສະໃໝທີ VI ພ້ອມທັງອະທິບາຍກ່ຽວກັບບັນຫາຕ່າງໆທີ່ສຳຄັນທີ່ຕິດພັນກັບເສດຖະກິດການຄ້າເພື່ອໃຫ້ບັນດາພະນັກງານ-ລັດຖະກອນໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງ. ຫລັງຈາກນັ້ນ, ທ່ານ ຄອນສະຫວັນ ສຸກກະເສີມ ຮອງຫົວໜ້າ ພະແນກອຸດສາຫະກຳ ແລະ ການຄ້າແຂວງ ໄດ້ຂຶ້ນເຜີຍແຜ່ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງກຽ່ວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 6 ເດືອນຕົ້ນປີ ແລະ ທິດທາງ ແຜນນການຈຸດສຸມ 6 ເດືອນທ້າຍປີ 2018 ແລະ ທ່ານຍັງໄດ້ຍົກໃຫ້ເຫັນ ຫຼາຍດ້ານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດສັງຄົມເພື່ອໃຫ້ພະນັກທຸກຄົນໄດ້ຮັບຮູ້, ພາຍຫຼັງໄດ້ເຜີຍແຜ່ມິຕິກອງປະຊຸມສະພາແລ້ວ ທ່ານພັກສົມດີວົງສາວັນດີ ກໍ່ໄດ້ຂື້ນ ເຜີຍແຜ່ຂໍ້ຕົກລົງວ່າດ້ວຍການຈັດຕັ້ງເຄື່ອນໄຫວຂອງພະແນກອຸດສາຫະກໍາ ແລະ ການຄ້າແຂວງ ແລະ ນະຄອນຫຼວງສະບັບເລກທີ 0918/ອຄ,ກຈພ ລົງວັນທີ 10 ກໍລະກົດ 2018 ທີ່ຫາກໍປັບປຸງ ໃໝ່ ເພື່ອບັນດາພະນັກງານ, ລັດຖະກອນ ພາຍໃນພະແນກ ໄດ້ຮັບຮູ້ ແລະ ເຂົ້າໃຈ ແລະ ພ້ອມກັນນໍາເອົາໄປຈັດຕັ້ງປະຕິບັດ.

ໃນຕອນທ້າຍຂອງກອງປະຊຸມ ທ່ານປະທານ ໄດ້ເໜັ້ນໜັກຕື່ມຕໍ່ກັບແນວຄິດພະນັກງານ ແລະ ການຈັດຕັ້ງປະຕິບັດວຽກງານວິຊາສະເພາະຂອງຂະແໜງການຕົນ ໂດຍເໜັ້ນໜັກດັ່ງນີ້:
1.   ໃຫ້ບັນດາຄະນະພັກ, ຄະນະພະແນກ, ຄະນະໜ່ວຍພັກ, ຄະນະຂະແໜງ ເອົາໃຈໃສ່ຕື່ມ ໃນການສຶກສາອົບຮົມການເມືອງແນວຄິດຂອງພະນັກງານ ພາຍໃນການຄຸ້ມຄອງຂອງຕົນ ໃຫ້ສະຕິຕໍ່ການຈັດຕັ້ງ, ເອົາໃຈໃສ່ປະຕິບັດກົດໝາຍລັດຖະກອນຢ່າງເຂັ້ມງວດ.
2.   ໃຫ້ບັນດາພະນັກງານ, ລັດຖະກອນ ເອົາໃຈໃສ່ເພີ້ມທະວີ ການຄົ້ນຄ້ວາບັນດານິຕິກໍາຕ່າງໆ ທີ່ຕິດພັນກັບໜ້າວຽກຂອງຕົນ, ຊອກຫາຄວາມຮູ້ໃໝ່ ເພື່ອໃຫ້ທັນກັບສະພາບການປ່ຽນແປງໃນຍຸກປັດຈຸບັນ ແລະ ກາຍເປັນພະນັກງານສືບທອດທີ່ມີຄວາມຮູ້ຄວາມສາມາດ.
3.   ເອົາໃຈໃສ່ ໃນການປະຕິບັດວຽກງານດ້ານວິຊາສະເພາະ ໂດຍກໍາແໜ້ນ ແລະ ປະຕິບັດຕາມລະບຽບຫລັກການ ເພື່ອຫລີກເວັ້ນບັນດາປະກົດການຫຍໍ້ທໍ້ທີ່ອາດຈະເກີດຂຶ້ນ.
4.   ເອົາໃຈໃສ່ວຽກງານການຄຸ້ມຄອງລາຄາສິນຄ້າ ໂດຍສະເພາະຊ່ວງນີ້ເປັນໄລຍະຊ່ວງນໍ້າຖ້ວມ ໃຫ້ສືບຕໍ່ລົງຕິດຕາມລາຄາສິນຄ້າ 3 ຄັ້ງ/ອາທິດ ເພື່ອຫລີກເວັ້ນການສວຍໂອກາດຂຶ້ນລາຄາສິນຄ້າ ໂດຍບໍ່ສົມເຫດສົມຜົນ.
5.   ສືບຕໍ່ເອົາໃຈໃສ່ຊຸກຍູ້ສົ່ງເສີມ ບັນດາສິນຄ້າທີ່ມີໜໍ່ແໜງ ໃນການຂໍກາໝາຍໂອດອບ ໃຫ້ສາມາດປະຕິບັດສໍາເລັດຕາມຄາດໝາຍ ຄື ໃນປີ 2020 ສູ້ຊົນໃຫ້ໄດ້ 10 ຫົວໜ່ວຍ.


No comments:

Post a Comment