May 9, 2018

ພິທີຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ, ຄັ້ງທີ IV ປະຈຳປີ 2017 ຂອງບັນດາໜ່ວຍພັກ ຂຶ້ນກັບຄະນະພັກຮາກຖານ ພະແນກອຸດສາຫະກໍາ ແລະ ການຄ້າ.

ໃນລະຫວ່າງວັນທີ 4 ພຶດສະພາ 2018 ທີ່ຜ່ານມາ ຮາກຖານພັກພະແນກອຸດສາຫະກຳ ແລະ ການຄ້າແຂວງ ໄດ້ຈັດພິທີຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ, ຄັ້ງທີ IV ປະຈຳປີ 2017 ຂຶ້ນ ໂດຍເປັນກຽດເຂົ້າຮ່ວມເປັນປະທານຂອງ: ສະຫາຍ ບຸນຄໍາ ໄຊເຢຍລໍວື ຄະນະປະຈຳພັກແຂວງ ປະທານກວດກາພັກລັດແຂວງ. ສະຫາຍ        ແສງອາລຸນ ແສງອາພອນ   ເລຂາຄະນະພັກຮາກຖານ ພະແນກອຸດສາຫະກຳ ແລະ ການຄ້າ ແຂວງ. ມີບັນດາຄະນະພັກຮາກຖານ, ຄະນະໜ່ວຍພັກ, ບັນດາສະມາຊິກພັກ ເຂົ້າຮ່ວມ ຈຳນວນ 31 ສະຫາຍ ຍີງ 9 ສະຫາຍ ແລະ ບັນດາແຂກຖືກເຊີນ ຈາກຮາກຖານພັກອ້ອມຂ້າງ ຈໍານວນ 5 ສະຫາຍ ຍີງ 1 ສະຫາຍ.

         
ໃນພິທີດັ່ງກ່າວ ສະຫາຍ ພັກສົມດີ ວົງສາວັນດີ ຮອງເລຂາຄະນະພັກຮາກຖານ ໄດ້ຂຶ້ນຜ່ານ ບົດສະຫລຸບ ຕີລາຄາການສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ປີ 2017 ແລະ ໄດ້ເປັນເອກະພາບຮັບຮອງເອົາທິດທາງແຜນການປີ 2018 ຂອງໜ່ວຍພັກ ແລະ ຮາກຖານພັກພະແນກ ອຸດສາຫະກຳ ແລະ ການຄ້າ ແຂວງບໍລິຄຳໄຊ. ຫລັງຈາກນັ້ນ, ສະຫາຍ ອຸດອນ ຄໍາພຽນ  ຄະນະພັກຮາກຖານ ໄດ້ຂຶ້ນຜ່ານ ມະຕິຕົກລົງ ຂອງຄະນະປະຈໍາພັກແຂວງບໍລິຄໍາໄຊ ວ່າດ້ວຍການຮັບຮອງເອົາໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປະຈໍາປີ 2017 ຊຶ່ງສາມາດຮັກສາໄດ້ ໜ່ວຍພັກເຂັ້ມແຂງ-ຮູ້ນໍາພາຮອບດ້ານ ມີ 03 ໜ່ວຍພັກ ດັ່ງນີ້:
1.    ໜ່ວຍພັກຂະແໜງກວດກາລັດ-ຂະແໜງສົ່ງເສີມ ແລະ ພັດທະນາສີນຄ້າ.
2.    ໜ່ວຍພັກຂະແໜງທະບຽນ ແລະ ຄຸ້ມຄອງວິສາຫະກິດ-ຂະແໜງການຄ້າພາຍໃນ.
3.    ໜ່ວຍພັກຂະແໜງນຳເຂົ້າ-ສົ່ງອອກ-ຂະແໜງສະຖິຕິ-ແຜນການ.
ໂດຍເປັນກຽດຢ່າງສູງ ຂຶ້ນມອບໃບຢັ້ງຢືນດັ່ງກ່າວ ໂດຍ ສະຫາຍ ບຸນຄໍາ ໄຊເຢຍລໍວື ຄະນະປະຈໍາພັກແຂວງ, ປະທານກວດກາພັກລັດແຂວງ. ຫລັງຈາກນັ້ນ, ໃນພິທີດັ່ງກ່າວ ໄດ້ພ້ອມກັນຮັບຟັງ ການໂອ້ລົມມີຄໍາເຫັນ ຈາກຄະນະພັກຂັ້ນເທິງ ໂດຍສະຫາຍ ບຸນຄໍາ ໄຊເຢຍລໍວື ໄດ້ເນັ້ນໜັກບາງບັນຫາ ດັ່ງນີ້:
1.    ໃຫ້ເອົາໃຈໃສ່ ເພີ້ມທະວີການຈັດຕັ້ງເຊື່ອມຊຶມ ບັນດາເອກະສານ ແລະ ນິຕິກໍາ ຕ່າງໆ ເພື່ອເຮັດໃຫ້ສະມາຊິກພັກພະນັກງານກໍາແໜ້ນແນວທາງ ແລະ ນະໂຍບາຍ ຂອງພັກ ແລະ ລັດຖະບານ.
2.    ເອົາໃຈໃສ່ ລະບອບແບບແຜນວິທີເຮັດວຽກ ແລະ ການຊີ້ນໍານໍາພາ ເປັນໝູ່ຄະນະ, ຮັກສາໄດ້ຄວາມສາມັກຄີພາຍໃນຄະນະພັກ, ພາຍໃນສະມາຊິກພັກ.
3.    ກວດກາຕີລາຄືນ ບັນດາມາດຖານເງື່ອນໄຂ ທີ່ບັນດາໜ່ວຍພັກ ໄດ້ວາງຄາດໝາຍໄວ້ ເພື່ອພ້ອມກັນສືບຕໍ່ຈັດຕັ້ງປະຕິບັດ ແລະ ຮັກສາໄດ້ໜ່ວຍພັກເຂັ້ມແຂງ-ຮູ້ນໍາພາຮອບດ້ານ ໃນປີຕໍ່ໄປ.
4.    ຍົກສູງຄວາມຮັບຜິດຊອບ ຕາມສິດພາລະບົດບາດຂອງຕົນ ເພື່ອປະຕິບັດໜ້າທີ່ວຽກງານ ທີ່ໄດ້ຮັບມອບໝາຍສໍາເລັດຕາມລະດັບຄາດໝາຍ ແລະ ຕ້ອງມີຄວາມຊື່ສັດ, ໂປ່ງໃສ.

ພາຍຫລັງ ໄດ້ຮັບຟັງການໂອ້ລົມຊີ້ນໍາ ຂອງຄະນະພັກຂັ້ນເທິງແລ້ວ, ສະຫາຍ ແສງອາລຸນ ແສງອາພອນ ເລຂາຄະນະພັກຮາກຖານ ໄດ້ຂຶ້ນຮັບຄໍາໂອວາດ ແລະ ໄດ້ໃຫ້ຄໍາໝັ້ນສັນຍາ ຈະນໍາເອົາທຸກເນື້ອໃນຄໍາເຫັນ ຂອງປະທານ ໄປຈັດຕັ້ງຜັນຂະຫຍາຍ ເພື່ອສືບຕໍ່ເຮັດໜ້າທີ່ການເມືອງຂອງຕົນ ໃຫ້ປະສົບຜົນສໍາເລັດ ແລະ ສາມາດຮັກສາ ນາມມະຍົດໜ່ວຍພັກເຂັ້ມແຂງ-ຮູ້ນໍາພາຮອບດ້ານໄດ້ໃນປີຕໍ່ໄປ ສໍາລັບໜ່ວຍພັກທີ່ຍັງບໍ່ທັນໄດ້ ກໍ່ຈະສືບຕໍ່ກໍ່ສ້າງໃຫ້ໄດ້ຕາມຄາດໝາຍ.

No comments:

Post a Comment