March 14, 2017

ຄະນະພັກຮາກຖານ ພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ ສຳເລັດກອງປະຊຸມໃຫຍ່ ຄັ້ງທີ I

ກອງປະຊຸມໃຫຍ່ ຄັ້ງທີ I ຂອງຄະນະພັກຮາກຖານພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊໄດ້ໄຂຂຶ້ນຢ່າງເປັນທາງການໃນວັນທີ 03 ມີນາ 2017 ທີ່ຫ້ອງປະຊຸມພະແນກຖະແຫຼງຂ່າວ ແລະ ວັດທະນາທຳ ໂດຍການເຂົ້າຮ່ວມຂອງສະ ຫາຍ ບຸນມາ ບຸຈະເລີນ ຮອງເລຂາພັກແຂວງ, ຮອງເຈົ້າແຂວງ,  ສະຫາຍ ແສງອາລຸນ ແສງອາພອນ ເລຂາຄະນະພັກຮາກຖານ, ຫົວໜ້າພະ ແນກອຸດສາຫະກຳ ແລະ ການຄ້າ,  ມີຄະນະພັກ, ສະ ມາຊິກພັກພາຍໃນ ແລະ ອ້ອມຂ້າງເຂົ້າຮ່ວມ.

       ວາລະກອງປະຊຸມ ສະຫາຍ ແສງອາລຸນ ແສງອາພອນ ໄດ້ສະຫຼຸບຄືນໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ໄດ້ກຳນົດ​ວິ​ໄສ​ທັດ​ຮອດ​ປີ 2030, ຍຸດ​ທະ​ສາດຮອດປີ 2025 ​ແລະ ​ແຜນ​ພັດທະນາອຸດສາຫະກຳ ແລະ ການຄ້າ ຮອດ​ປີ 2020 ​ເຊິ່ງມີ​ເນື້ອ​ໃນ​ຕົ້ນຕໍ​ດັ່ງ​ນີ້ :
 ຮອດປີ 2030
ປະກອບສ່ວນໃນການສ້າງແຂວງບໍລິຄຳໄຊ ເປັນປະຕູເສດຖະກິດ ແຫຼ່ງຜະລິດພະລັງງານ ບໍລິການທາງຜ່ານ ແລະ ຮັກສາສິ່ງແວດລ້ອມແບບຍືນຍົງ
ເຮັດໃຫ້ຂະແໜງອຸດສາຫະກຳ ແລະ ການຄ້າ ແຂວງບໍລິຄຳໄຊ  ຫັນອຸດສາຫະກຳເປັນທັນສະໄໝ ການຄ້າກ້າວໄກຕາມກົນໄກເສດຖະກິດຕະຫຼາດ ເພີ້ມຄວາມສາມາດໃນການແຂ່ງຂັນ ຕາມທິດເຊື່ອມໂຍງ
ຮອດປີ 2025
ເຮັດໃຫ້ອຸດສາຫະກຳປຸງແຕ່ງທົ່ວແຂວງບໍລິຄຳໄຊ ເປັນທັນສະໄໝ ໂດຍສະເພາະແມ່ນການຍົກສູງປະສິດ ທິພາບ ແລະ ປະສິດທິຜົນຂອງການຜະລິດ ແລະຍົກລະດັບທາງດ້ານສີມືແຮງງານ, ນຳໃຊ້ເຕັກໂນໂລຍີທີ່ທັນສະໄໝເພື່ອມາປຸງແຕ່ງຜິດເປັນສິນຄ້າທີ່ແຂວງມີທ່າແຮງ ສາມາດແຂ່ງຂັນກັບສາກົນ ແລະ ພາກພື້ນ.
ອຳນວຍຄວາມສະດວກໃນການນຳເຂົ້າ-ສົ່ງອອກສິນຄ້າ, ການຂື້ນທະບຽນ ແລະ ການຈໍລະຈອນຂາຍຍົກ-ຂາຍຍ່ອຍ ຫັນໄປສູ່ການນຳເຄື່ອງມືທີ່ທັນສະໄໝ.
  ຮອດປີ 2020
ປະກອບສ່ວນເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງໝັ້ນທ່ຽງຮັບປະກັນດ້ານສະຖຽນ ລະພາບດ້ານເສດຖະກິດມະຫາພາກການດຸ່ນດຽງລະຫວ່າງການພັດທະນາ ແລະ ການສະໜອງທຶນ ໂດຍໃຫ້ສອດຄ່ອງກັບເງື່ອນໄຂທ່າແຮງທີ່ມີ.
ພັດທະນາຊັບພະຍາກອນພະນັກງານຂະແໜງອຸດສາຫະກຳ ແລະ ການຄ້າ ແຂວງບໍລິຄຳໄຊ ໃຫ້ມີຄຸນນະພາບມີລະບຽບວິໄນປັບປຸງແບບແຜນວິທີການເຮັດວຽກງໃຫ້ແທດເໝາະກັບສະພາບການຕົວຈິງ, ສ້າງຄວາມເຂັ້ມແຂງໃຫ້ຜູ້ປະກອບການທຸລະກິດ ໃຫ້ມີຄວາມສາມາດແຂ່ງຂັນຫລາຍຂື້ນ ໃນສະພາບແວດລ້ອມການເຊື່ອມໂຍງ ເສດຖະກິດພາກພື້ນ ແລະ ສາກົນ.
ສ້າງຜົນປະໂຫຍດຈາກການເຊື່ອມໂຍງເສດຖະກິດພາກພື້ນ ແລະ ສາກົນ ໂດຍການເອົາໃຈໃສ່ວຽກງານສຶກສາຄົ້ນຄ້ວາ ແລະ ໃຫ້ຂໍ້ມູນຂ່າວສານແກ່ພາກທຸລະກິດ, ດຶງດູດການລົງທຶນໃນກິດຈະການທົ່ວໄປ ທັງພາຍໃນ ແລະ ຕ່າງປະເທດ ໃຫ້ໄດ້ຫລາຍຂື້ນເພື່ອມາພັດທະນາວຽກງານລວມຂອງແຂວງ.
ຄາດໝາຍສູ້ຊົນ
-  ຊຸກຍູ້, ພັກດັນ, ຮັບປະກັນເຮັດໃຫ້ເສດຖະກິດຂອງແຂວງ ຂະຫຍາຍຕົວໝັ້ນທ່ຽງ ແລະ ຕໍ່ເນື່ອງດ້ວຍຈັງ ຫວະ 7,8 % ຂື້ນໄປ.
-  ສູ້ຊົນໃຫ້ອັດຕາການຂະຫຍາຍຕົວຂອງຈຳນວນໂຮງງານ ເພີ້ມຂື້ນສະເລ່ຍ 1,08 % ຕໍ່ປີ.
-  ສູ້ຊົນເຮັດໃຫ້ມູນຄ່າຂອງການສົ່ງອອກສິນຄ້າ ບັນລຸ 214,27 ລ້ານໂດລາສະຫະລັດ ຂະຫຍາຍຕົວສະເລ່ຍ 26,2% ຕໍ່ປີ. ນໍາເຂົ້າບໍໃຫ້ເກີນ 2.182,65 ລ້ານໂດລາສະຫະລັດ ຂະຫຍາຍຕົວສະເລ່ຍ 30 % ຕໍ່ປີຂາດດຸນ 3,8 % ຕໍ່ປີ.
-  ສູ້ຊົນໃຫ້ມູນຄ່າຈໍລະຈອນສິນຄ້າຂາຍຍົກ ຂະຫຍາຍຕົວສະເລ່ຍ 35,57 % ຕໍ່ປີ.
-  ສູ້ຊົນໃຫ້ມູນຄ່າຈໍລະຈອນສິນຄ້າຂາຍຍ່ອຍ ຂະຫຍາຍຕົວສະເລ່ຍ 7,14 % ຕໍ່ປີ.
-  ສູ້ຊົນອຳນວຍຄວາມສະດວກໃຫ້ຫົວໜ່ວຍທຸລະກິດຂອງແຂວງເພີ້ມຂື້ນສະເລ່ຍ 10,86% ຕໍ່ປີ.
- ສູ້ຊົນສ້າງຜະລິດຕະພັນ ODOP ໃຫ້ໄດ້ຕື່ມ 10 ຫົວໜ່ວຍ.

        ກອງປະຊຸມຄັ້ງນີ້ ຍັງໄດ້ປ່ອນບັດຄັດເລືອກເອົາຄະນະພັກຊຸດໃໝ່ ເຊິ່ງມີຜູ້ສະໝັກທັງໝົດ 7 ສະຫາຍ ຍິງ 1 ສະຫາຍ ໄດ້ເລືອກເອົາ 5 ສະຫາຍ ຍິງ 1 ສະຫາຍ ຄື ສະຫາຍ ແສງອາລຸນ ແສງອາພອນ ເປັນເລຂາຄະນະພັກຮາກຖານ, ສະຫາຍ ພັກສົມດີ ວົງສາວັນດີ ເປັນຮອງເລຂາ, ສະຫາຍ ບຸນເພັງ ໄຊສົງຄາມ ເປັນຜູ້ກວດກາ, ສະຫາຍ ອຸດອນ ຄຳພຽນ ແລະ ສະຫາຍ ນາງ ມະນີວັນ ວົງສະຫວັດ ເປັນກຳມະການ.

       .ໃນຕອນທ້າຍຂອງກອງປະຊຸມ ສະຫາຍ ບຸນມາ ບຸຈະເລີນ ຮອງເລຂາພັກແຂວງ, ຮອງເຈົ້າແຂວງ ຍັງໄດ້ເປັນກຽດກ່າວໂອ້ລົມ ເຊິ່ງສະຫາຍໄດ້ເນັ້ນໜັກໃຫ້ຄະນະພັກຊຸດໃໝ່ ຈົ່ງເອົາໃຈໃສ່ສຶກສາອົບຮົມການເມືອງແນວຄິດ ເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ສະມາຊັກພັກ, ລັດຖະກອນ ທົ່ວຂະແໜງອຸດສາຫະກຳ ແລະ ການຄ້າ ໄດ້ເປັນເຈົ້າການຕ້ານປາກົດການຫຍໍ້ທໍ້ຕ່າງໆເພີ່ມທະວີຄວາມເປັນແບບ ຢ່າງນຳໜ້າຂອງສະມະຊິກພັກ ເປັນແບບຢ່າງໃນການປະຕິບັດໜ້າທີ່ວຽກງານ ແລະ ການດຳລົງຊີວິດ ສ້າງໜ່ວຍພັກໃຫ້ກາຍເປັນໜ່ວຍພັກແຂງ ຮູ້ນຳພາຮອບດ້ານ ເອົາໃຈໃສ່ ສົ່ງເສີມຫົວໜ່ວຍທຸລະກິດຂະໜາດນ້ອຍ ແລະ ກາງ, ການດັດສົມໂຮງງານປຸງແຕ່ງໄມ້, ສົ່ງເສີມການຜະລິດເປັນສິນຄ້າ ເພື່ອຮັບປະກັນການຕອບສະໜອງຄວາມຕ້ອງການຂອງສັງຄົມທີ່ນັບມື້ເພີ່ມຂື້ນ ແລະ ສົ່ງອອກ ປະກອບສ່ວນສ້າງວຽກເຮັດງານທຳ ແລະ ລາຍໄດ້ໃຫ້ປະຊາຊົນຮູ້ຊື້, ຮູ້ຂາຍ ຊ່ວຍຫຼຸດຜ່ອນຄວາມທຸກຍາກໃນເຂດຊົນນະບົດຫ່າງໄກສອກຫຼີກ. ຄຸ້ມຄອງລາຄາສິນຄ້າເຊິ່ງສາມາດດຸ່ນດ່ຽງການສະໜອງ ແລະ ຄວາມຕ້ອງການຊົມໃຊ້ພາຍໃນແຂວງ ເຊິ່ງເຮັດມຫ້ລາຄາສິນຄ້າມີຄວາມສະຫງົບ, ບໍ່ສົ່ງຜົນກະທົບແຮງຕໍ່ຊີວິດການເປັນຢູ່, ການຜະລິດ ແລະ ທຸລະກິດ ພາຍໃນແຂວງນັບມື້ນັບຂະຫຍາຍຕົວຍີ່ງຂື້ນ.

No comments:

Post a Comment