February 3, 2017

ອາຫານນໍາເຂົ້າຈາກຕ່າງປະເທດ ຢູ່ຕາມທ້ອງຕະລາດ ພາຍໃນແຂວງບໍລິຄຳໄຊ ຍັງພົບສານດອງສົບ

 ​
ພິທີທຳລາຍ​ສິນຄ້າ​ເສື່ອ​ມຄຸນ​ນະພາ​ບໝົດ​ອາຍຸ​ການ​ນຳ​ໃຊ້, ຊິງ​ຊັ່ງບໍ່​ໄດ້​ມາດຕະຖານ ​ແລະ ອາຫານ​ທີ່​ມີ​ສານ​ເຄມີ​ປົນ​ເປື້ອນ ​ໄດ້​ຈັດ​ຂຶ້ນ​ໃນ​ຕອນ​ບ່າຍ​ຂອງ​ວັນ​ທີ 26 ມັງກອນ 2017 ຢູ່​ເດີ່ນຍົນ​ແຂວງບໍລິຄຳໄຊ, ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ເພັງ ​ໄຊ​ສົງຄາມ ຮອງ​ຫົວໜ້າ​ພະ​ແນ​ກອຸດສາຫະກຳ ​ແລະ ການ​ຄ້າ​ແຂວງ ພ້ອມ​ດ້ວຍ​ພະນັກງານວິຊາ​ການ ​ແລະ ພະ​ແນ​ກການ​ອ້ອມຂ້າງແຂວງ​ເຂົ້າ​ຮ່ວມ.



ໂດຍອີງຕາມກົດໝາຍວ່າດ້ວຍການປົກປ້ອງຜູ້ຊົມໃຊ້  ສະບັບເລກທີ 02/ສພຊ, ລົງວັນທີ 30 ມີຖຸນາ 2010 ແລະ ອີງຕາມຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ສະບັບເລກທີ 161/ຂບຊ ລົງວັນທີ 22 ມີນາ 2013 ວ່າດ້ວຍການນຳໃຊ້ມາດຕະການ ດ້ານລະບຽບກົດໝາຍຕໍ່ຜູ້ລະເມີດ ດັ່ງນັ້ນຂະແໜງການຄ້າພາຍໃນ ຈຶ່ງໄດ້ລົງກວດກາສິນຄ້າເສຍຄຸນ-ໝົດອາຍຸການນຳໃຊ້, ຊິງຊັ່ງບໍ່ໄດ້ມາດຕະຖານ, ອາຫານທະເລທີ່ມີສານຕົກຄ້າງເຈືອນປົນ ໄດ້ຈຳນວນຫຼາຍລາຍການທີ່ນຳມາທຳລາຍຖິ້ມ. ເຊິ່ງເລີ່ມຈັດຕັ້ງປະຕິບັດຕົວຈິງມາແຕ່ວັນທີ 20-23 ທັນວາ 2016 ເປັນຕົ້ນມາ ແລະ ສາມາດກວດພົບຫຼາຍລາຍການຄື: ສິນຄ້າໝົດອາຍຸ-ເສຍຄຸນຈຳນວນ 6 ລາຍການ ມູນຄ່າ 23.312.000 ກີບ, ຊິ່ງຊັ່ງບໍ່ໄດ້ມາດຕະຖານ 7 ໜ່ວຍ ມູນຄ່າ 770.000 ກີບ, ອາຫານທະເລທີ່ມີສານຕົກຄ້າງ ສານຟໍມາລີນ, ປາມຶກສົດ 33,5 ກິໂລ ມູນຄ່າ 502.000 ກີບ, ເຫັດເຂັມໃຫຍ່ 107 ກິໂລ ມູນຄ່າ 2.675.000 ກີບ, ສະເພາະຄັ້ງທີ 7 ມີຈຳນວນ 9 ລາຍການລວມມູນຄ່າ 27.259.000 ກີບ ແລະ ຈຳນວນທີ່ຍຶດມາໄດ້ທັງໝົດ 9 ຄັ້ງ ມີ 424 ລາຍການ ລວມມູນຄ່າທັງໝົດ 139.812.000 ກີບ. ສິນຄ້າດັ່ງກ່າວໄດ້ທຳລາຍຖິ້ມໂດຍການໃຊ້ໄຟຈູດ ແລະ ຂຸດຂຸມຝັງ ພ້ອມນັ້ນຍັງໄດ້ສຶກສາອົບຮົມເຮັດບົດບັນທຶກກ່າວເຕືອນໃຫ້ຜູ້ປະກອບການຊື້-ຂາຍ ແນະນຳໃຫ້ພໍ່ແມ່ປະຊາຊົນໃຫ້ມີສະຕິຂຶ້ນຕື່ມໃນການຈຳໜ່າຍຊົມໃຊ້ສິນຄ້າ ເພາະມັນຈະສົ່ງຜົນສະທ້ອນຕໍ່ສຸຂະພາບຄົນເຮົາທີ່ນຳມາບໍລິໂພກ.

ໝາຍເຫດ: ຮູບພາບ ແລະ ບົດຂ່າວຈາກເວັບໄຊແຂວງບໍລິຄຳໄຊ

No comments:

Post a Comment