August 5, 2016

ປະຖະ​ກະຖາລະນຶກ​ເຖິງ ຊີວິດ​ພາລະກິດ​ປະຕິວັດຂອງ​ ທ່ານສີ​ສົມ​ພອນ ລໍ​ວັນ​ໄຊ

​ໃນ​ຕອນ​ເຊົ້າ​ຂອງ​ວັນ​ທີ 5 ສິງຫາ 2016 ນີ້ຢູ່​ທີ່​ຫ້ອງ​ປະຊຸມ​ຂອງ​ພະ​ແນ​ກອຸດສາຫະກຳ ແລະ ການຄ້າ​ແຂວງ​ ໄດ້​ຈັດ​ພິທີ​ປະຖະ​ກະຖາລະນຶກ​ເຖິງ ຊີວິດ​ພາລະກິດ​ປະຕິວັດຂອງ​ທ່ານສີ​ສົມ​ພອນລໍ​ວັນ​ໄຊ, ໃຫ້​ກຽດປະຖະກະຖາ​ໂດຍ ​ທ່ານແສງອາລຸນ ແສງອາພອນ ຫົວໜ້າພະແນກ ​ພ້ອມທັງບັນດາ​ພະນັກງານຫົວໜ້າຂະແໜງ, ຮອງຂະແໜງ ແລະພະນັກງານ​ພາຍ​ໃນ​ພະ​ແນ​ກ​ເຂົ້າ​ຮ່ວມ​ຮັບ​ຟັງຢ່າງພ້ອມພຽງ.

ທ່ານ ແສງອາລຸນ ແສງອາພອນ ໄດ້ໃຫ້ຮູ້ວ່າ :ທ່ານ ສີສົມພອນ ລໍວັນໄຊ ເກີດເມື່ອວັນທີ 07 ກໍລະກົດ 1916 ມາຮອດປະຈຸບັນແມ່ນຄົບຮອບ 100 ປີ, ເຊິ່ງເປັນລູກຫຼານປະຊາຊົນລາວຊາວແຂວງບໍລິຄຳໄຊ ເປັນຄົນໜຶ່ງທີ່ມີຄວາມຕື່ນຕົວຮັກຊາດຕັ້ງແຕ່ຍັງໜຸ່ມນ້ອຍ ເມື່ອຮອດອາຍຸ 22 ປີ ເພິ່ນໄດ້ເລີ່ມເຄື່ອນໄຫວປະຕິວັດ ເປັນພະນັກງານແກ່ນສານປິດລັບກໍ່ສ້າງຮາກຖານການເມືອງ ປະກອບອາວຸດຂອງປະຊາຊົນຢູ່ຂັ້ນບ້ານ ແລະ ຕາແສງ, ຍ້ອນມີຄວາມອົງອາດກ້າຫານ ມີ ໄຫວພີກ ແລະ ເດັດດ່ຽວໜຽວແໜ້ນ ຈິ່ງໄດ້ຮັບຄວາມໄວ້ວາງໃຈຈາກພັກ-ລັດ, ການຈັດຕັ້ງ ແລະ ໄດ້ຮັບຜິດຊອບວຽກງານທີ່ສຳຄັນຫຼາຍດ້າຍຫຼາຍລະດັບ ຈາກການເປັນຮອງການເມືອງ, ເປັນຫົວໜ້າການເມືອງກອງຮ້ອຍ ທະຫານທ້ອງຖິ່ນ ກ້າວຂື້ນເຖິງເປັນຫົວໜ້າເຂດ 5 ວຽງຈັນ ໄດ້ຊີ້ນຳວຽກງານກໍ່ສ້າງຮາກຖານ ໃນສາມເມືອງຄື: ເມືອງບໍລິຄັນ, ເມືອງຫີນບຸນ ແລະ ເມືອງຄຳເກີດ, ສະນັ້ນ ປະຊາຊົນໃນເຂດ 4 ຕາແສງ ເຂດຊາຍແດນລາວ-ຫວຽດນາມ ເປັນຕົ້ນແມ່ນ ຕາແສງນາແຈ່ງ, ຕາແສງຈຳ, ນ້ຳສັກ, ພັນວຽງ ຂອງເມືອງຄຳເກີດ ກໍ່ຄືປະຊາຊົນບັນດາເຜົ່າໃນເຂດທີ່ໝັ້ນທົ່ວແຂວງບໍລິຄຳໄຊ ແລະ ເຂດພາກກາງຂອງປະເທດລາວເຮົາລ້ວນແຕ່ຮູ້ຈັກທ່ານ ສີສົມພອນ ລໍວັນໄຊ ໃນຖານະນັກຮົບປະຕິວັດ ຜູ້ໜຸ່ມນ້ອຍທີ່ໄດ້ເຄື່ອນໄຫວປະຕິວັດຢ່າງຫ້າວຫັນ ເພື່ອປຸກລະດົມຂົນຂວາຍປະຊາຊົນບັນດາເຜົ່າ, ຊັ້ນຄົນຕ່າງໆ, ຈັດຕັ້ງກຳລັງປະກອບອາວຸດຂອງປະຊາຊົນຢູ່ທ້ອງຖິ່ນຮາກຖານເພື່ອນຳພາຕໍ່ສູ້ຕ້ານຈັກກະພັດຜູ້ຮຸກຮານ ເພື່ອເປັນເອກະພາບເປັນເອກະລາດຂອງຊາດ, ອິດສະຫຼະພາບ ແລະ ສິດເປັນເຈົ້າປະເທດຊາດຂອງປະຊາຊົນລາວເຮົາ,


ທ່ານ ສີສົມພອນ ລໍວັນໄຊ ແມ່ນພະນັກງານທີ່ໄດ້ເຕີບໃຫຍ່ຂື້ນ ໃນຂະບວນການຕໍ່ສູ້ປະຕິວັດຂອງມະຫາຊົນ ແລະ ໄດ້ຜ່ານການທົດສອບອັນຂ້ຽວຂາດ, ສ່ຽງເປັນສ່ຽງຕາຍມາເທົ່າໃດເທື່ອ, ເຖິງວ່າຖືກສັດຕູຈັບກຸ່ມທຸບຕີທໍລະມານແຕ່ກໍ່ບໍ່ໄດ້ເຮັດໃຫ້ເພີ່ນເກີດມີຄວາມທໍ້ຖອຍໝົດກຳລັງໃຈ ແລ້ວປະລະອຸດົມຄະຕິປະຕິວັດແຕ່ຢ່າງໃດ, ກົງກັນຂ້າມມັນພັດເປັນການຊຸບຫຼໍ່ ໃຫ້ກາຍເປັນນັກຮົບປະຕິວັດຜູ້ຮັກຊາດທີ່ມີຄວາມເດັດດ່ຽວໜຽວແໜ້ນ, ມີມະນະອົດທົນ ທີ່ເອົາຕົນເຈື່ອຈານຕິດແໜ້ນກັບຂະບວນການຕໍ່ສູ້ຂອງປະຊາຊົນຂື້ນໄປເລື່ອຍໆ, ຕະຫຼອດໄລຍະແຫ່ງການເຄື່ອນໄຫວຂອງທ່ານ ສີສົມພອນ ລໍວັນໄຊ ຈະແມ່ນຢູ່ໃນໄລຍະແຫ່ງການຕໍ່ສູ້ປົດປ່ອຍຊາດ ກໍຄືໃນໄລຍະການປົກປັກຮັກສາ ແລະ ສ້າງສາປະເທດຊາດ, ລ້ວນແລ້ວແຕ່ໄດ້ປະກອບສ່ວນຢ່າງສົມກຽດດ້ວຍການເຄື່ອນໄຫວຢ່າງບໍໍ່ຮູ້ອິດ ຮູ້ເມື່ອຍ, ອຸທິດໝົດສະຕິປັນຍາ, ກຳລັງວັງຊາຂອງຕົນດ້ວຍຄວາມບໍລິສຸດສັດຊື່ ແລະ ຄວາມຈົງຮັກພັກດີຢ່າງສຸດຊຶງຕໍ່ອຸດົມການ ອຸດົມຄະຕິຂອງພັກ, ຂອງຊາດ, ຂອງປະຊາຊົນລາວບັນດາເຜົ່າ, ຄວາມເປັນແບບຢ່າງທາງດ້ານທັດສະນະຫຼັກໝັ້ນ, ມະນະຈິດ ແລະ ຄຸນສົົມບັດສິນທຳປະຕິວັດ ກໍຄືນ້ຳໃຈເສຍສະຫຼະຂອງເພິ່ນໄດ້ເປັນແວ່ນແຍງອັນໃສແຈ້ງສຳລັບພະນັກງານ, ສະມາຊິກພັກ, ນັກຮົບ ແລະ ປະຊາຊົນລາວຂອງພວກເຮົາ.

No comments:

Post a Comment