June 17, 2016

ກະຊວງອຸດສະຫະກໍາ ແລະ ການຄ້າ ເຜີຍແຜ່ຄໍາສັ່ງ ແຈ້ງການ ນາຍົກ ໃຫ້ຢຸດຕິສົ່ງອອກໄມ້ ທຸກປະເພດ

ໃນວັນທີ 16 ມິຖຸນານີ້, ທ່ານລັດຖະມົນຕີກະຊວງອຸດສະຫະກໍາ ແລະ ການຄ້າ ນາງ ເຂັມມະນີ ພົນເສນາ ໄດ້ເປັນປະທານກອງປະຊຸມເຜີຍແຜ່ເອກະສານແຈ້ງການເລກທີ 15 ຂອງນາຍົກລັດຖະມົນຕີແຫ່ງ ສປປ ລາວ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ໃຫ້ແກ່ພະນັກງານຫລັກແຫລ່ງອ້ອມຂ້າງກະຊວງດັ່ງກ່າວ,ເພື່ອເພີ່ມທະວີຄວາມຮັບຜິດຊອບ ແລະ ຮັບປະກັນຄວາມເປັນເອກະພາບໃນການຈັດຕັ້ງຜັນຂະຫຍາຍແຈ້ງການດັ່ງກ່າວມີຜົນສັກສິດ ແລະ ປາກົດຜົນເປັນຈິງ.

ຈຸດ​ປະ​ສົງ​ຂອງກອງ​ປະ​ຊຸມແມ່ນເພື່ອເປັນການເຜີຍ​ແຜ່​ຄຳ​ສັ່ງ ສະ​ບັບເລກທີ 15/ນຍ ວ່າ​ດ້ວຍ​ການເພີ້ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາ ການຂຸດຄົ້ນ, ເຄື່ອນຍ້າຍໄມ້ ແລະ ທຸລະກິດໄມ້, ແຈ້ງ​ການ ສະ​ບັບ​ເລກ​ທີ 769/ຫ​ສນຍ ລົງ​ວັນ​ທີ 1 ມິ​ຖຸ​ນາ 2016 ວ່າ​ດ້ວຍ​ການ​ຜັນ​ຂະ​ຫຍາຍ ແລະ ການ​ຈັດ​ຕັ້ງ​ປະ​ຕິ​ບັດ ຄຳ​ສັ່ງ ສະ​ບັບເລກ​ທີ 15/ນຍ, ລົງ​ວັນ​ທີ 13 ພຶດສະພາ 2016 ແລະ ນິ​ຕິ​ກຳຜັນຂະຫຍາຍຄຳ​ສັ່ງ 15/ນຍ ຂອງບັນດາກະຊວງກ່ຽວ​ຂ້ອງໃຫ້ແກ່​ພາກ​ລັດ ແລະ ພາກ​ທຸ​ລະ​ກິດ​ໄມ້​ລາວ​.
ໃນ​ໂອ​ກາດ​ນີ້, ທ່ານ​ ຮອງນາ​ຍົ​ກ​ລັດຖະມົນຕີ ສົມດີ ດວງດີ ໄດ້ຊີ້ແຈງໃຫ້ຜູ້ເຂົ້າຮ່ວມ ຮັບຊາບເຖິງນະ​ໂຍ​ບາຍຂອງ​ລັດ​ຖະ​ບານ ທີ່ຕ້ອງ​ການ​ຊຸກ​ຍູ້ສົ່ງເສີມ​ການຫັນ​ເປັນ​ອຸດ​ສາ​ຫະ​ກຳປຸງ​ແຕ່ງ​ໄມ້​ສຳ​ເລັດ​ຮູບ​ທີ່​ແທ້​ຈິງ ໂດຍໃຫ້ສອດ​ຄ່ອງກັບ​ທິດ​ທາງ​ການພັດ​ທະ​ນາເສດ​ຖະ​ກິດແບບ​ຍືນ​ຍົງ, ສີ​ຂຽວ, ເປັນ​ມິດ​ກັບ​ສິ່ງ​ແວດ​ລ້ອມ ແລະ ​ເຮັດ​ໃຫ້ເນື້ອ​ທີ່​ປົກຫຸ້ມປ່າ​ໄມ້ກວມ 70% ຂອງ​ເນື້ອ​ທີ່​ທົ່ວ​ປະ​ເທດໃນ​ປີ 2020. ພ້ອມດຽວກັນ, ທ່ານ ຍັງໄດ້​ຮຽກ​ຮ້ອງໃຫ້ພາກ​ທຸ​ລະ​ກິດລາວ ໂດຍ​ສະ​ເພາະຜູ້​ທີ່​ດຳ​ເນີນ​ທຸ​ລະ​ກິດໂຮງງານປຸງແຕ່ງໄມ້ ແລະ ໂຮງງານເຟີນີເຈີ ເຂົ້າໃຈ ແລະ ເຫັນໄດ້ເຖິງຄວາມເອົາ​ໃຈ​ໃສ່ຂອງ ລັດຖະບານ ໃນການແກ້ໄຂບັນຫາການຄຸ້ມຄອງ ແລະ ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້. ພ້ອມທັງຂໍໃຫ້ເປັນເອກະພາບ ໃນ​ການຜັນຂະຫຍາຍ ແລະ ຈັດຕັ້ງປະຕິບັດໃຫ້ຖືກຕ້ອງ, ສອດຄ່ອງ, ໄປຕາມໃນ​ລວງດຽວກັນ ໂດຍ​ສະ​ເພາະ:
❖    ຄວາມ​ເປັນ​ເອກ​ະ​ພາບ​ ແລະ ເປັນເຈົ້າການ​ໃນ​ການ​ຈັດ​ຕັ້ງ​ປະ​ຕິ​ບັດ ​ບັນ​ດາຄຳ​ສັ່ງ​, ແຈ້ງ​ການ ທີ່​ລັດ​ຖະ​ບານ​ວາງ​ອອກ ລວມ​ທັງຄຳ​ສັ່ງ​ເລກ​ທີ 15/ນຍ ແລະ ບັນ​ດາຄຳ​ສັ່ງ, ແຈ້ງ​ການຜັນ​ຂະ​ຫຍາຍ​ຄຳ​ສັ່ງ 15/ນຍຂອງ​ຂະ​ແໜງ​ການ​ທີ່​ກ່ຽວ​ຂ້ອງ ຢ່າງເຂັ້ມງວດ;
❖    ​ໃຫ້ຢຸດ​ເຊົາ​ການ​ຊື້​ຂາຍ​ໄມ້​ທີ່ບໍ່​ຖືກ​ລະ​ບຽບ, ໂດຍ​ສະ​ເພາະ​ແມ່ນ​ການ​ຊື້​ໄມ້​ກັບ​ປະ​ຊາ​ຊົນ (ທີ່ບໍ່​ມີ​ທະ​ບຽ​ນ​ສວນ​ປູກ) ທັງນີ້ກໍເພື່ອບໍ່​ເປັນການ​ສົ່ງ​ເສີມ​ການ​ຂຸດ​ຄົ້ນ​ໄມ້ແບບ​ຜິດ​ກົດ​ໝາຍ;
❖    ໃຫ້ບັນ​ດາ​ໂຮງ​ງານປຸງແຕ່ງໄມ້ຕ້ອງໄດ້ຮີບຮ້ອນປັບ​ປຸງ ແລະ ດັດສົມ​ຕົນ​ເອງ ​ໃຫ້​ສອດ​ຄ່ອງ​ກັບ​ນະໂຍບາຍ, ນິຕິກຳຂອງລັດຖະບານ ແລະ ກະຊວງທີ່ກ່ຽວຂ້ອງວາງອອກ ໂດຍສະເພາະແມ່ນ ທີ່ຕັ້ງຂອງໂຮງ​ງານ ​ທ​ີ່​ຕັ້ງ​ຢູ່​ໃນເຂດປ່າສະຫງວນແຫ່ງຊາດ, ປ່າປ້ອງກັນແຫ່ງຊາດ ແລະ ປ່າຜະລິດ;
❖    ການ​ເຄື່ອນ​ຍ້າຍ​ໄມ້ຂອງບັນດາໂຮງງານຕ້ອງປະ​ຕິ​ບັດ​ໃຫ້ຖ​ືກ​ຕ້ອງ ແລະ ສອດ​ຄ່ອງ​ກັບນິ​ຕິ​ກຳ​ທີ່​ຂະ​ແໜງ​ການ​ທີ່​ກ່ຽວ​ຂ້ອງວາງ​ອອກ, ໂດຍ​ສະ​ເພາ​ະ​ນໍ້​າໜັກຂອງ​ລົດ​ບັນ​ທຸກ​ຕ້ອງບໍ່​ເກີນ​ຕາມເກນ​ມາດຕະຖານ ທີ່​ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ກຳ​ນົດ, ການ​​ເຄື່ອນ​ຍ້າຍຕ້ອງ​ປະ​ຕິ​ບັດ​ໃຫ້​ຖືກ​ໂມງ​ເວ​ລາ (ບໍ່ໃຫ້ເຄື່ອນຍ້າຍຫຼັງຈາກ 6 ໂມງແລງ);
❖    ໃຫ້​ບັນດາໂຮງງານປຸງແຕ່ງໄມ້ ຕ້ອງໄດ້ເພີ້ມທະວີການປະ​ສານ​ສົມທົບ​ທີ່​ດີ​ພາຍ​ໃນ​ກຸ່ມ ແລະ ສົມທົບກັບກຸ່ມໂຮງງານເຟີນີເຈີ ໂດຍໃຫ້ມີການ​ແບ່ງ​ງານ, ມີການແບ່ງ​ປັນ​ກັນ​ຜະ​ລິດເປັນກຸ່ມ (Cluster), ມີການ​ສະ​ໜອງ​ຂໍ້​ມູນ​ຕະຫຼາດ ​ແລະ ການ​ເຂົ້າ​ເຖິງ​ຕະຫຼາດ;
❖    ໃຫ້ບັນດາໂຮງງານ​ຫັນມາ​ນຳ​ໃຊ້​ໄມ້ປູກເພື່ອເປັນວັດ​ຖຸ​ດິບ​ສະ​ໜອງ​ການ​ຜະ​ລິດພາຍໃນໂຮງງານ. ສຳລັບໂຮງ​ງານ​ໃດ​ທີ່​ມີ​ທ່າ​ແຮງ ແມ່ນ​ໃຫ້​ມີ​ການ​ປູກ​ໄມ້ ເພື່ອ​ສະ​ໜອງ​ແກ່​ໂຮງງ​ານ​ຂອງ​ຕົນ ແລະ ຈຳໜ່າຍສະໜອງໃຫ້ໂຮງງານອື່ນໆ.
ກອງປະຊຸມໄດ້ດຳເນີນໄປຢ່າງຟົດຟື້ນ, ມີການຖາມຕອບບັນຫາເພື່ອເປັນການໄຂຂໍ້ຂ້ອງໃຈ ແລະ ອະທິບາຍໃຫ້ເກີດຄວາມກະຈ່າງແຈ້ງຕໍ່ກັບການຜັນຂະຫຍາຍເນື້ອໃນຂອງຄຳສັ່ງເລກທີ 15/ນຍ ແລະ ນິ​ຕິ​ກຳ​ຜັນ​ຂະ​ຫ​ຍາຍ 15/ນຍ ຂອງ​ບັນ​ດາ​ຂະ​ແໜງ​ການ ເພື່ອຮັບປະກັນການຈັດຕັ້ງປະຕິບັດໃຫ້ມີຄວາມເປັນເອກະພາບ ແລະ ປະກົດຜົນເປັນຈິງ.

ຂໍ້ມູນຈາກ: ລາວພັດທະນາ

No comments:

Post a Comment