May 4, 2016

ຫວນຄືນວັນຄ້າຍວັນເກີດທ່ານ ວະລາດີເມຍ ອິລິສ ເລນິນ, ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຈີນ, ວັນປົດປ່ອຍພາກໃຕ້ຫວຽດນາມ

ພິທີປາຖະກະຖາວັນຄ້າຍວັນເກີດທ່ານ ວະລາດີເມຍ ອິລິສ ເລນິນ ຄົບຮອບ 147 ປີ (22 ເມສາ 1870 – 22 ເມສາ 2016),​ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປ ຈີນ ຄົບຮອບ 56 ປີ ( 25 ເມສາ 1961 – 25 ເມສາ 2016), ວັນປົດປ່ອຍພາກໃຕ້ ສສ ຫວຽດນາມ ຄົບຮອບ 41 ປີ (30 ເມສາ 1975 – 30 ເມ ສາ 2016) ໄດ້ຈັດຂື້ນໃນວັນທີ 04 ພຶດສະພາ 2016 ຢູ່ທີ່ຫ້ອງປະຊຸມຂອງພະແນກຖະ ແຫລງຂ່າວ ແລະ ວັດ ທະນາທຳແຂວງ ໂດຍເປັນກຽດເຂົ້າຮ່ວມເປັນປະທານ ແລະ ເລົ່າຄືນມູນເຊື້ອ ຂອງທ່ານ ສະຫວນ ສະຫວ່າງ ເລຂາຄະນະພັກຮາກຖານ, ຫົວໜ້າພະແນກອຸດສາຫະກຳ ແລະ ການຄ້າແຂວງບໍລິຄຳໄຊ, ມີການນຳຂອງພະແນກ, ພ້ອມດ້ວຍພະນັກງານວິຊາການທັງໝົດ 59 ຄົນ ເຂົ້າຮ່ວມຮັບຟັງ

ຈຸດປະສົງໃນພິທີປາຖະກະຖາໃນຄັ້ງນີ້ກໍ່ເພື່ອເຮັດໃຫ້ສະມາຊິກພັກ, ພະນັກງານ ພາຍໃນພະແນກໄດ້ຮັບຮູ້ ແລະ ເຂົ້າໃຈເຊື່ອມຊືມຢ່າງເລິກເຊິ່ງຕໍ່ມູນເຊື້ອປະຫວັດສາດທີ່ສຳຄັນຂອງໂລກ, ເຫັນຜົນງານການຈັດຕັ້ງປະຕິບັດ ແລະ ນຳໃຊ້ລັດທິມາກ-ເລນິນ ເຂົ້າໃນການປະຕິບັດຂອງຊົນຊັ້ນກຳມະກອນ ຄວາມເປັນມາຂອງລະບອບສັງຄົມນິຍົມ, ຄວາມເປັນມາຂອງສາຍພົວພັນທາງການທູດ ລາວ-ຈີນ ແລະ ວັນປົດປ່ອຍພາກໄຕ້ຂອງ ສສ ຫວຽດນາມ.
     1.   ປະຫວັດທ່ານ ວະລາດີເມຍ ອິລິສ ອູລີຢາໂນຟ ເລນິນ
ທ່ານ ວະລາດີເມຍ ອິລິສ ອູລີຢາໂນຟ ເລນິນ ເກີດເມື່ອວັນທີ 10 ເມສາ 1870 ທີ່ເມືອງ ຊິມເບີກສເກີ ແຄມຝັ່ງແມ່ນ້ຳ ໂວນກາ ໃນຄອບຄົວປັນຍາຊົນ ພໍ່ຂອງເພີ່ນຊື່ ອິລິຢາ ນິໂກລາຍ ເຢວິດ ອູລີຢາໂນຟ ເຊິ່ງເປັນນາຍຄູ, ເປັນຜູ້ກວດກາການສຶກສາ, ເປັນອຳນວຍການໂຮງຮຽນປະຖົມ, ເປັນນັກເຄື່ອນໄຫວຕໍ່ສູ້ ເພື່ອເຮັດໃຫ້ເຜົ່າສ່ວນໜ້ອຍໄດ້ຮັບການສຶກສາ, ແມ່ຂອງເພີ່ນຊື່ ມາຣີຢາ ອາເລັກຊັງ ໂດຣຟນາ ອູລີຢາໂນຟວາ, ເປັນລູກທ່ານໝໍ ໄດ້ຮັບການສຶກສາຢູ່ພາຍໃນຄອບຄົວ ແຕ່ສາມາດເວົ້າພາສາຕ່າງປະເທດໄດ້ຫຼາຍພາສາ, ຊຳນານໃນການຫຼີ້ນປີອາໂນ, ເປັນແມ່ທີ່ມີພະລັງຈິດໃຈ ແລະ ນິດໄສເຂັ້ມແຂງ, ສະຫຼາດຮອບຄອບ, ຕະຫຼອດຊີວິດ ແມ່ນອຸທິຕົນໃຫ້ແກ່ການສຶກສາອົບຮົມລູກເຕົ້າ, ຄອບຄົວ ອູລີຢາໂນຟ ມີລູກນຳກັນທັງໝົດ 6 ຄົນ, ຍິງ 3 ຄົນ, ທ່ານ ເລນິນ ຮູ້ອ່ານໜັງສືແຕ່ອາຍຸ 5 ປີ, ເພີ່ນເປັນນັກຮຽນເກັ່ງ ຜົນການຮຽນນັບແຕ່ຊັ້ນປະຖົມຈົນຮອດມະຫາວິທະຍາໄລ ລ້ວນແຕ່ໄດ້ຄະແນນດີເລີດ ເພິ່ນໄດ້ອ່ານປື້ມກ່ຽວກັບການປະຕິບັດ, ມີແນວຄິດປະຕິບັດແຕ່ຕອນຮຽນຢູ່ມັດທະຍົມປີສຸດທ້າຍ ໃນຄອບຄົວຂອງທ່ານມີອ້າຍ ອາເລັກຊັງເດີຣ ຊຶ່ງເປັນອ້າຍກົກ ເປັນຜູ້ມີອິດທິພົນຈູງໃຈ ທ່ານ ເລນິນ ຫຼາຍກວ່າໝູ່ ຕົກມາຮອດເດືອນ 8 ປີ 1887 ອາເລັກຊັງເດີຣ ພ້ອມດ້ວຍໝູ່ເພື່ອນນັກສຶກສາຈຳນວນໜຶ່ງໄດ້ຖືກຈັບຂໍ້ຕູ່ຫາມີສ່ວນປະກອບໃນການກະກຽມລອບປົງພະຊົນພະເຈົ້າຊາ ອາລັກຊັງທີ III ແລະ ກໍ່ໄດ້ຖືກປະຫານຊີວິດໃນເວລາຕໍ່ມາ, ການຕາຍຂອງອ້າຍ ອາລັງຊັງເດີຣ ໄດ້ກະທົບກະເທືອນເຖິງຈິດໃຈ ທ່ານ ເລນິນ ຢ່າງຮຸນແຮງ ເຮັດໃຫ້ເພິ່ນຕັດສິນໃຈຢ່າງໜັກແໜ້ນອຸທິດຊີວິດຂອງຕົນໃຫ້ແກ່ການປະຕິບັດ ຍົກຍ້ອງຄວາມກ້າຫານ, ການເສຍສະຫຼະຂອງຜູ້ເປັນອ້າຍ ແຕ່ເພິ່ນບໍ່ໄດ້ໄປຕາມເສັ້ນທາງທີ່ອ້າຍຂອງເພິ່ນເລືອກ, ເພິ່ນເວົ້າວ່າ “ ບໍ່, ພວກເຮົາຈະບໍ່ໄປຕາມເສັ້ນທາງນີ້, ມັນບໍ່ແມ່ນ ເສັ້ນທາງທີ່ຖືກຕ້ອງ “ ຫຼັງຈາກນັ້ນທ່ານ ເລນິນ ກໍ່ໄດ້ມີຜົນງານ ແລະ ຄຸນງາມຄວາມດີ ເປັນຜູ້ສືບທອດພາລະກິດປະຕິບັດ ຂອງທ່ານ ກາກມາກ ແລະ ທ່ານ ອັງແກນ ໃນການເສີມຂະຫຍາຍລັດທິມາກ ຢ່າງປະດິດສ້າງເຂົ້າໃນການປະຕິວັດຣັດເຊຍ, ເປັນຜູ້ກໍ່ສ້າງ ນຳພາພັກໂບນເຊວິກ ເຊິ່ງເປັນພັກຂອງຊົນຊັ້ນກຳມະຊີບ, ນຳພາສ້າງລັດສັງຄົມນິຍົມທຳອິດຂອງໂລກ ການປະຕິບັດຂອງຊົນຊັ້ນກຳມະຊີບຢູ່ຣັດເຊຍ ໄດ້ເປັນຈຸດເລີ່ມຕົ້ນແຫ່ງການປະຕິບັດໄປສູ່ສັງຄົມນິຍົມ ຂອງຫຼາຍໆປະເທດ ເຮັດໃຫ້ສະຕະວັດທີ່ XX ກາຍເປັນສະຕະວັດແຫ່ງການປະຕິບັດສັງຄົມນິຍົມ ຕະຫຼອດຊີວິດຂອງທ່ານ ເລນິນ ເພິ່ນໄດ້ທຸ່ມເທໃຫ້ແກ່ການຂຽນປື້ມ, ຂຽນບົດນິພົນທີ່ມີຊື່ສຽງຫຼາຍບົດ, ຫຼາຍປື້ມ ເພື່ອແນໃສ່ຕ້ານກັບລັດທີສວຍໂອກາດຕ່າງໆ ໃນພັກສັງຄົມປະຊາທິປະໄຕ ແລະ ຂະບວນກຳມະກອນຣັດເຊຍ “ ໄປກ້າວໜຶ່ງ ຖອຍຫຼັງສອງກ້າວ “ ເຊຶ່ງມີເນື້ອໃນແນໃສ່ການປັບປຸງກໍ່ສ້າງພັກ, ປັບປຸງຄວາມສາມັກຄີພາຍໃນພັກ ແລະ ລະບຽບວິໄນຂອງພັກ ເພື່ອປະຕິບັດຂອງຊົນຊັ້ນກຳມະກອນ ແລະ ຊາວຜູ້ອອກແຮງງານໃນທົ່ວໂລກ
2.   ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປ ຈີນ ຄົບຮອບ 56 ປີ
ຄວາມເປັນມາ ແລະ ມູນເຊື້ອແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປ ຈິນ ກ່ອນປີ 1975 ການພົວພັນຮ່ວມມື ລາວ-ຈິນ ແມ່ນຢູ່ໃນຮູບແບບການສະໜັບສະໜູນຊ່ວຍເຫຼືອໃຫ້ແກ່ພາລະກິດຕໍ່ສູ້ຂອງປະຊາຊົນລາວບັນດາເຜົ່າ ເພື່ອຂັບໄລ່ຈັກກະພັດຕ່າງດ້າວ ແລະ ໂຄ່ນລົ້ມຊົນຊັ້ນປົກຄອງທີ່ກົດຂີ່ຂູດຮີດ ໃນຖານະທີ່ສອງປະເທດມີເສັ້ນຊາຍແດນຕິດຈອດກັນ ເປັນປະເທດບ້ານໃກ້ເຮືອນຄຽງ ສິ່ງສຳຄັນແມ່ນມີພັກກອມມູນິດ ນຳພາການປະຕິບັດຄືກັນ ພັກ-ລັດຖະບານ ແລະ ປະຊາຊົນຈິນອ້າຍນ້ອງໄດ້ຢູ່ຄຽງຂ້າງ ໃຫ້ການສະໜັບສະໜູນຊ່ວຍເຫຼືອແກ່ການປະຕິບັດລາວ ທັງດ້ານວັດຖຸ ຈິດໃຈ ທັງໃນເວທີສາກົນພາກພື້ນ ມີການໄປມາຢ້ຽມຢາມກັນຕະຫຼອດມາ, ອັນທີ່ພົ້ນເດັ່ນກວ່າໝູ່ແມ່ນ ປີ 1959 ປະທານ ໄກສອນ ພົມວິຫານ ເລຂາທິການໃຫຍ່ຂອງພັກປະຊາຊົນລາວ ( ພັກປະຊາຊົນປະຕິບັດລາວໃນປະຈຸບັນ ) ໄດ້ໄປຢ້ຽມຢາມ ສປ ຈິນ, ຈາກນັ້ນກໍ່ມີຜູ້ນຳທ່ານອື່ນໆ ໄປຢ້ຽມຢາມ ສປ ຈິນ ຫຼາຍຄັ້ງ ເພື່ອແຈ້ງສະພາບການ ຂອງການປະຕິວັດລາວ, ປຶກສາຫາລືກ່ຽວກັບບັນຫາການຊ່ວຍເຫຼືອ ຂອງ ສປ ຈິນ ໃຫ້ແກ່ການປະຕິວັດລາວ ຕົກມາຮອດເດືອນ 4 ປີ 1961 ລັດຖະບານປະສົມແຫ່ງຊາດ ນຳໂດຍ ສະເດັດເຈົ້າ ສຸວັນນະພູມາ ນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ໄປຢ້ຽມຢາມ ສປ ຈິນ, ໄດ້ເຊັນເອກະສານທີ່ສຳຄັນວ່າດ້ວຍການສ້າງສາຍຕັ້ງ ສາຍສຳພົວພັນການທູດນຳກັນ ໃນວັນທີ 25 ເມສາ 1961 ນັ້ນແມ່ນເຫດຜົນທີ່ສຳຄັນຍິ່ງໃຫຍ່ໃນປະຫວັດສາດຂອງການພົວພັນ ລາວ-ຈິນ, ສປປ ລາວ ແລະ ສປ ຈິນ ແມ່ນສອງປະເທດທີ່ມີຊາຍແດນຕິດຈອດກັນຍາວ 505 ກິໂລິແມັດ ດ້ວຍສາຍພູ ແມ່ນນ້ຳລຳເຊ, ປະຊາຊົນສອງຊາດມີສາຍພົວພັນ ມິດຕະພາບມາແຕ່ບູຮານນະການ ມູນເຊື້ອຮັກແພງສາມັກຄີ ຊ່ວຍເຫຼືອເຊິ່ງກັນ ແລະ ກັນ ມີນ້ຳໃຈມິດຕະພາບ ນັບມື້ນັບເພີ່ມທະວີ ຜູ້ນຳສອງພັກ  ແລະ ລັດ ໄດ້ສືບຕໍ່ເພີ່ມທະວີການຢ້ຽມຢາມກັນ ໄດ້ມີການແລ່ກປ່ຽນ ຄະນະຜູ້ແທນຂັ້ນຕ່າງໆ, ຖອດຖອນບົດຮຽນນຳກັນ ເປັນປະຈຳໃນທຸກດ້ານ ຂະຫຍາຍສາຍພົວພັນມິດຕະພາບ ການຮ່ວມມືທາງດ້ານເສດຖະກິດ, ການຄ້າ, ວິທະຍາສາດເຕັກນິກ, ວັດທະນະທຳ ບົນພື້ນຖານຄວາມສະເໝີພາບ ຕ່າງຝ່າຍຕ່າງມີຜົນປະໂຫຍດ.
    3.   ວັນປົດປ່ອຍພາກໃຕ້ ສສ ຫວຽດນາມ ຄົບຮອບ 41 ປີ
ໃນທ້າຍສັດຕະວັດທີ 19 - ຕົ້ນສັດຕະວັດທີ 20 ລັດທິລ່າເມືອງຂື້ນຝຣັ່ງໄດ້ເຂົ້າມາຮຸກຮານຢຶດເອົາ 3 ຊາດອິນດູຈີນ ກາຍເປັນອານານິຄົມຂອງຝຣັ່ງເສດ, ພາຍໃຕ້ການນຳພາ ຂອງພັກ ຄອມມູນິດອິນດູຈີນ ແລະ ປະທານ ໂຮ່ຈິ່ມິນ, ປະຊາຊົນຫວຽດນາມໄດ້ລຸກຂື້ນຕໍ່ສູ້ຈົນຮອດເດືອນ 8, ປີ 1945 ໄດ້ລຸກຮື້ຂື້ນຢຶດອໍານາດ ປະກາດເອກະລາດ, ວັນທີ 2 ກັນຍາ 1945, ແຕ່ມາຮອດປີ 1946 ຈັກກະພັດຝຣັ່ງ ໄດ້ກັບຄືນມາຮຸກຮານຫວຽດນາມຄັ້ງທີ່ 2 ປະຊາຊົນຫວຽດນາມໄດ້ສືບຕໍ່ການຕໍ່ສູ້ຕ້ານຝຣັ່ງ ຈົນຮອດວັນທີ 7 ພຶດສະພາ 1954 ສາມາດຮັບໄຊຊະນະ ແລະ ໄດ້ທັບມ້າງສູນບັນຊາການໃຫຍ່ຂອງຝຣັ່ງເສດ ຢູ່ດຽນບຽນຟູໄດ້ ນຳໄປສູ່ການເຊັນສາຍາເຊີແນວກ່ຽວກັບອິນດູຈີນ 20 ກໍລະກົດ 1954 ແຕ່ນ້ໍາເມີກບໍ່ທັນ ແຫ້ງ ຈັກກະພັດອາເມລິກາ ໄດ້ເຂົ້າມາຮຸກຮານເປັນເທື່ອໃໝ່ ຍີ່ງຮ້າຍກາດກວ່າເກົ່າ ມີກຳລັງທະຫານ, ພາຫະນະສົງຄາມທັນສະໄໝ, ໄດ້ຕັ້ງຖານທັບຫຼາຍແຫ່ງ ເພື່ອມາຮຸກຮານປະເທດອິນດູຈີນ ຍຸດທະສາດ ແລະ ກົນອຸບາຍຂອງຈັກກະພັດອາເມລິກາ ມີຕໍ່ຫວຽດນາມ ໄດ້ຕັດແບ່ງຫວຽດນາມເປັນ 2 ພາກ ນັບແຕ່ເສັ້ນຂະໜານທີ 17 ອົງສາ ລົງໄປເປັນພາກໃຕ້ ຢູ່ໃນເຂດຄວບຄຸມຊົ່ວຄາວຂອງອາເມລິກາ ແລະ ພວກທະຫານຫຸ່ນໄຊງອນ ເປີດສົງຄາມກັບພາກເໜືອຫວຽດນາມ, ກວາດເອົາປະຊາຊົນໄປຄ້າຍອົບພະຍົບຢູ່ພາກໃຕ້,  ດຳເນີນສົງຄາມ ແຕ່ຝ່າຍດຽວ ເຂັ່ນຂ້າປະຊາຊົນຫວຽດນາມຫຼາຍກວ່າ 8 ໝື່ນຄົນ, ຈັບກຸ່ມຜູ້ຮັກຊາດຫຼາຍກວ່າ 5 ແສນຄົນ ຕະຫຼອດ 21 ປີ ທີ່ຄອບຄອງພາກໃຕ້ຫວຽດນາມ ອາເມລິກາໄດ້ລົງທຶນສູງທີ່ສຸດໃຫ້ແກ່ລັດທິຕ້ານຄອມມູນິດ ນັບທັງພື້ນຖານວັດຖຸ, ເງິນຄຳ, ອາວຸດຍຸດທະພັນ ແລະ ເລ່ຫຼ່ຽມດ້ານວັດທະນະທຳ ແນວຄິດທີ່ໂຫດຫ້ຽມ ແລະ ປະຕິການຂຸດຂີດ ພວກເຂົາໄດ້ດຳເນີນສົງຄາມດ້ວຍຫຼາຍຮູບແບບ ນັບແຕ່ສົງຄາມຕ້ານກັບປະຊາຊົນ, ສົງຄາມພາກສ່ວນ, ສົງຄາມພິເສດ, ສົງຄາມເຢັນຂອງຫວຽດນາມ,​ ສົ່ງຄາມທາງອາກາດ ທຳລາຍພາກເໜືອຫວຽດນາມ, ສາມາດເວົ້າໄດ້ວ່າ: ສົງຄາມອາເມລິກາ ທຳລາຍຫວຽດນາມ ແມ່ນສົງຄາມລ້າງຜານ ທີ່ບໍ່ເຄີຍມີມາໃນຕະຫຼອດເຄິ່ງທ້າຍສັດຕະວັດທີ່ 20, ແມ່ນສົງຄາມເຂັນຂ້າດ້ວຍລະເບີດ, ລູກປືນ, ຍົນຍຸດທະສາດ ທີ່ທັນສະໄໝທີ່ສາມາດຖີ້ມລະເບີດ,​ ລູກບົ່ມທາດເຄມີ ລົງລ້າງຜານນັບທັງຄົນ ແລະ ສັດ ຕະຫຼອດຮອດທັງພືກສາຊາດກໍ່ຖືກທຳລາຍກ້ຽງ, ເຖິ່ງຢ່າງໃດກໍ່ຕາມດ້ວຍນ້ຳໃຈຮັກຊາດອັນແຮງກ້າ, ຄຽດແຄ້ນຈັກກະພັດຢ່າງເລິກເຊິ່ງ ຂອງປະຊາຊົນຫວຽດນາມ ຜູ້ພິລະອາດຫານ, ໂດຍສືບຕໍ່ມູນເຊື້ອວິລະຊົນແຫ່ງການສ້າງສາ ແລະ ປົກປັກຮັກສາປະເທດຊາດມານານ 4 ພັນປີ, ປະຊາຊົນຫວຽດນາມ ພາຍໃຕ້ການນຳພາຂອງພັກຄອມມູນິດຫວຽດນາມ ໄດ້ລຸກຂື້ນຕໍ່ສູ້ກູ້ຊາດ ຕ້ານຈັກກະພັດອາເມລິກາ ແລະ ລູກມື 20 ກວ່າປີ ຢ່າງໜັ້ນໜຽວ ເພື່ອກອບກູ້ເອົາເອກະລາດ, ອິດສະຫຼະພາບມາໃຫ້ປະເທດຊາດຂອງຕົນຕາມຄຳສັ່ງສອນຂອງພັກ ຂອງປະທານ ໂຮ່ຈິ່ມິນ ທີ່ເວົ້າວ່າ “ ບໍ່ມີຫຍັງປະເສີດເລີດລ້ຳກວ່າເອກະລາດ ແລະ ເສລີພາບ “ ຫັຼງຈາກນັ້ນກໍ່ໄດ້ຮັບໄຊຊະນະອັນຍິ່ງໃຫຍ່ຂອງພັກ, ປະຊາຊົນຫວຽດນາມ ໃນປະຫວັດສາດ 4 ພັນປີ, ຂອງການສ້າງສາ ແລະ ປົກປັກຮັກສາປະເທດຊາດ ໄຊຊະນະດັ່ງກ່າວ ແມ່ນການທັບມ້າງກົງຈັກການທະຫານອັນໃຫຍ່ໂຕເຂັ້ມແຂງ, ທັນສະໄໝກວ່າໝູ່ໝົດ ຢູ່ທະວີບອາຊີອາຄະເນໄດ້ຢ່າງສົມບູນ, ໄຊຊະນະລະດູບານໃໝ່ປີ 1975 ຢູ່ພາກໃຕ້ຫວຽດນາມ ແມ່ນໄຊຊະນະລວມແຫ່ງກ້ອນກຳລັງສາມັກຄີພິເສດ, ຮ່ວມສຳພັນສູ້ຮົບ ລະຫວ່າງ ຫວຽດນາມ, ລາວ, ກຳປູເຈຍ ສາມອ້າຍນ້ອງ ແມ່ນສະໜາມຮົບ ຢູ່ບົນດິນແດນ ແຫຼມອິນດູຈີນອັນດຽວກັນ, ຕ້ານສັດຕູຜູ້ຮຸກຮານໂຕດຽວກັນ ແມ່ນປັດໄຈທ່າແຮງຊຸກດັນໄຊຊະນະເຊິ່ງກັນ ແລະ ກັນ, ເປັນການໄຂສັງກາດໃຫ້ຫວຽດນາມມີສັນຕິພາບ, ເອກະພາບ ແລະ ກ້າວຂື້ນສັງຄົມນິຍົມ, ດຳເນີນການປ່ຽນແປງໃໝ່, ຫັນເປັນອຸດສະຫະກຳທັນສະໄໝຂື້ນໄປເລື້ອຍໆ ຈົນທຸກເທົ່າວັນນີ້.
ຂໍ້ມູນຈາກ: ເວັບໄຊແຂວງບໍລິຄຳໄຊ

ສັງລວມ ແລະ ຮຽບຮຽງໂດຍ ຂະແໜງແຜນການ-ສະຖິຕິ

No comments:

Post a Comment