March 1, 2016

ຜະລິດຕະພັນ ຢາພື້ນເມືອງ ກາພູເຂົາຄວາຍ ໄດ້ຖືກຮັບຮອງເປັນສິນຄ້າ ODOP

ໃນວັນທີ 17 ກຸມພານີ້, ຢູ່ບ້ານໂພນສະຫວັນ ເມືອງທ່າພະບາດ ແຂວງບໍລິຄຳໄຊ ໄດ້ປະກາດຮັບຮອງການນຳໃຊ້ກາໝາຍ ໜຶ່ງເມືອງ ໜຶ່ງຜະລິດຕະພັນ ODOP ຂອງຜະລິດຕະພັນຢາພື້ນເມືອງກາພູເຂົາຄວາຍ  ບ້ານໂພນສະຫວັນ. ໂດຍເປັນກຽດເຂົ້າຮ່ວມຂອງທ່ານ ບຸນເສັງ ປະທຳມະວົງ ຮອງເຈົ້າແຂວງ ບໍລິຄຳໄຊ, ທ່ານ ບຸນສົງ ເພັດຈະເລີນ ເຈົ້າເມືອງທ່າພະບາດ, ທ່ານ ສະຫວນ ສະຫວ່າງ ຫົວໜ້າພະແນກອຸດສາຫະກຳ ແລະ ການຄ້າແຂວງ, ຮອງເຈົ້າເມືອງ ແລະ ເມືອງອ້ອມຂ້າງ, ຫົວໜ້າຫ້ອງການ ມີບັນດາແຂກທີ່ຖືກເຊີນ ເຂົ້າຮ່ວມ.

ອາຈານຄໍາພັນ ຈັນທະປັນຍາ ໄດ້ລາຍງານກ່ຽວກັບປະຫວັດຄວາມເປັນມາ ແລະ ການສ້າງຕັ້ງຮ້ານຂາຍຢາພື້ນເມືອງ ພູເຂົາຄວາຍຮູ້ວ່າ: ຂ້າພະເຈົ້າ  ເກີດເມື່ອວັນທີ 05/07/1950 ສັນຊາດລາວ ສາສະໜາພຸດ ປັດຈຸບັນຢູ່ບ້ານໂພນສະຫວັນ ເມືອງທ່າພະບາດ ແຂວງບໍລິຄຳໄຊ ລະດັບການສຶກສາ ຈົບ ປ3 ຢູ່ທີ່ໂຮງຮຽນປະຖົມ ປາກກະດິງເໜືອ ເມືອງປາກກະດິງ. ປີ 1961-1967 ໄດ້ເຂົ້າບວດເພື່ອສຶກສາຮໍ່າຮຽນ ບາລີ  ແລະ ໄດ້ຮໍ່າຮຽນວິຊາຢາພື້ນເມືອງ ພືດສາດນາໆພັນຢູ່ທີ່ວັດໂພສີ ເມືອງປາກຊັນ. ຈາກນັ້ນໄດ້ຍ້າຍມາສຶກສາຮໍ່າຮຽນວິຊາຄາຖາຢາພື້ນເມືອງຕົວຈິງ ສືບທອດຕໍ່ຢູ່ທີ່ວັດ ພຣະທາດພຣະບາດ-ໂພນສັນ ນໍາພະອາຈານເພົ້າ ພຸດທະວັງໂສ, ຈາກນັ້ນໄປສຶກສາຕໍ່ໃນວິຊາແພດສາດ ນາໆພັນ ການແພດແຜນໄທ ນຳພະອາຈານສົມບູນ ຢູ່ທີ່ວັດ ຖໍ້າກະບອກ ຈັງຫວັດຂອນແກນ ປະເທດໄທ. ຕໍ່ມາໄດ້ເຂົ້າຝຶກອົບຮົມການແພດ ແລະ ການຢາພື້ນເມືອງຢູ່ທີ່ວັດໂສກປ່າຫຼວງ ພຸດທະວົງ ນະຄອນຫຼວງວຽງຈັນ ນຳພະອາຈານໃຫຍ່ ດຣ ຊາລີ ກັນຕະຊາໂລ ແລະ ຈາກນັ້ນກໍໄດ້ສິກອອກມາ. ປີ1976-1999 ໄດ້ປະກອບສ່ວນປິ່ນປົວພໍ່ແມ່ປະຊາຊົນ ພາຍໃນເມືອງທ່າພະບາດ ໂດຍນຳໃຊ້ວິຊາຄາຖາຢາພື້ນເມືອງ ໃນການປິ່ນປົວ, ນັບແຕ່ປີ 2000 ເປັນຕົ້ນມາໄດ້ມີແນວຄິດລິເລີ່ມ ທີ່ຈະຜະລິດຢາພື້ນເມືອງອອກຈຳໜ່າຍ ຈົນມາຮອດປີ 2005 ກໍ່ໄດ້ສ້າງຕັ້ງທຸລະກິດກ່ຽວກັບຢາພື້ນເມືອງຂຶ້ນໂດຍໃສ່ຊື່ວ່າ: ຢາພື້ນເມືອງກາພູເຂົາຄວາຍ ແລະ ໄດ້ຮັບໃບອະນຸຍາດຂອງຂະແໜງສາທາລະນະສຸກ ເລກທີ 02/06 ສທ.ຂບຊ. ການຜະລິດຕົ້ນຕໍຂອງຢາພື້ນເມືອງ ເຊິ່ງເອີ້ນວ່າ: ຫັດຖະກຳປຸງແຕ່ງຢາພື້ນເມືອງ ໂດຍຖືເອົາພືດນາໆພັນ ເປັນຕົ້ນແມ່ນ: ເຄືອ, ຜັກ, ຫຍ້າ, ຈຳພວກຫົວ ຫຼື ເຫງົ້າ ແລະ ເຫັດຕ່າງໆ, ສັດວັດຖຸ: ໄດ້ແກ່ເຄື່ອງອະໄວຍະວະຂອງສັດຕ່າງໆ ຈຳພວກ ແຂ້ວ, ເຂົາ, ນໍ, ງາ. ທາດວັດຖຸ: ໄດ້ແກ່ ເຫຼັກ, ທອງເຫຼືອງ, ທອງແດງ, ກົ່ວ, ເງິນ, ທອງຄຳ, ນົມຜາ, ຫີນແຂ້ວມ້າ, ເກືອທາ, ສີລາຍອນ, ຂີ້ເຈຍ, ພິມມະເສນ ແລະ ມາດເປັນຕົ້ນ ເຊິ່ງມີມູນຄ່າຜະລິດຕະພັນ ເຫຼົ່ານີ້ເມື່ອທຽບໃສ່ລາຄາເພີ່ມຂຶ້ນຫຼາຍເທົ່າຕົວ. ຜະລິດຕະພັນຕົ້ນຕໍທີ່ມັກຜະລິດມີ ຢານວດເສັ້ນນໍ້າມັນຫອມຫວ້ານ 108, ຢາດີກະເພາະ, ຢາດີລົງຂາວ, ຢາບຳລຸງຢູ່ໄຟ, ຢາດີອັກເສບທາງໃນ, ຢາຮົມ, ຊາໃບຜັກອີ່ຮຸມ, ຢາດອງເຫຼົ້າບຳລຸງກຳລັງ, ຢາດົມແກ້ວິນວຽນ, ຢານໍ້າມັນຂີ້ເຜິ້ງ 108, ຢາດົມລິດສີດວງດັງ, ຢາສະຜົມ ແລະ ອື່ນໆ.
ຜະລິດຕະພັນຢາພື້ນເມືອງ ກາພູເຂົ້າຄວາຍ ແມ່ນໄດ້ຮັບຄວາມນິຍົມຈາກສັງຄົມຢ່າງກວ້າງຂວາງ ຖືກຕ້ອງຕາມຫຼັກການ ຂອງວິຊາການແພດພື້ນເມືອງ ດັ່ງນັ້ນ, ເມືອງທ່າພະບາດ ຈື່ງໄດ້ຈັດພິທີ ມອບນາມມະຍົດ ໜື່ງເມືອງໜື່ງຜະລິດຕະພັນ ຫຼື ODOP ເປັນສັນຍາລັກຂອງຜະລິດຕະພັນຢ່າງສົມກຽດ.
ຂໍ້ມູນຈາກ: 
http://bolikhamxay.gov.la/index.php/lo/2014-07-16-03-52-11/ຂ່າວປະຈຳວັນ/585-ຜະລິດຕະພັນ-ຢາພື້ນເມືອງ-ກາພູເຂົາຄວາຍ-ໄດ້ຖືກຮັບຮອງເປັນສິນຄ້າ-odop.html

No comments:

Post a Comment