February 2, 2016

ສອງລັດຖະບານ ລາວ-ຫວຽດນາມ ເຊັນສັນຍາການຄ້າຊາຍແດນສະບັບທຳອິດ

ໃນວັນທີ 27 ມີຖຸນາ 2015 ຢູ່ທີ່ເທດສະບານເມືອງເກືອລໍ, ແຂວງເຫງະອານ, ສສ ຫວຽດນາມ ໄດ້ຈັດພິທີເຊັນສັນຍາການຄ້າຊາຍແດນ ລາວ-ຫວຽດນາມ ຂຶ້ນ ຢ່າງເປັນທາງການ ລະຫວ່າງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສະຫະກຳ ແລະ ການຄ້າ ຕາງໜ້າໃຫ້ລັດຖະບານ ສປປ ລາວ ແລະ ທ່ານ ຫວູ ຮຸຍ ຮວາງ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ຕາງໜ້າໃຫ້ລັດຖະບານ ສສ ຫວຽດນາມ ໂດຍໃຫ້ກຽດເປັນສັກຂີພິຍານຂອງ ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ແລະ ທ່ານຮອງນາຍົກລັດຖະມົນຕີ ຫງວຽນ ຊວນ ຟຸກ ເຊິ່ງມີບັນດາການນຳຈາກກະຊວງ, ກົມກອງ ແລະ ຫ້ອງການທີ່ກ່ຽວຂ້ອງຂອງສອງຝ່າຍ ເຂົ້າຮ່ວມ.

ສັນຍາການຄ້າຊາຍແດນສະບັບນີ້ ລວມມີ 23 ມາດຕາ ເຊິ່ງເນື້ອໃນຕົ້ນຕໍຂອງສັນຍາ ລວມມີບັນດາລະບຽບການຂອງການເຄື່ອນໄຫວຊື້-ຂາຍ, ແລກປ່ຽນສິນຄ້າຂອງປະຊາຊົນ ທີ່ດຳລົງຊີວິດລຽບຕາມຊາຍແດນ, ຕະຫຼາດຊາຍແດນ ແລະ ການຕົກລົງເປັນເອກະພາບຂອງ 2 ຝ່າຍ ກ່ຽວກັບບັນດາດ່ານ ທີ່ເປີດໃຫ້ມີການເຄື່ອນໄຫວການຄ້າຊາຍແດນ ແລະ ການບໍລິການ ທີ່ສະໜັບສະໜູນ, ເອື້ອອຳນວຍຕ່າງໆ ບົນພື້ນຖານຕາມກົນໄກພິເສດ ທີ່ຮອງຮັບເຄື່ອນໄຫວຂອງການຄ້າຊາຍແດນ ເພື່ອໃຫ້ສອດຄ່ອງກັບສົນທິສັນຍາສາກົນ 2 ຝ່າຍ ແລະ ຫຼາຍຝ່າຍ ທີ່ສອງປະເທດເປັນພາຄີ. ການຍົກເວັ້ນພາສີ, ອາກອນນຳເຂົ້າ-ສົ່ງອອກ ແລະ ອາກອນມູນຄ່າເພີ່ມ (0%) ໃຫ້ບັນດາສິນຄ້າ ທີ່ນໍາເຂົ້າຈາກ ລາວ ແລະ ຫວຽດນາມ ເພື່ອເປັນການຊຸກຍູ້, ສົ່ງເສີມ ການລົງທຶນເຂົ້າໃສ່ ບັນດາຂົງເຂດລຽບຊາຍແດນ, ເຂດພູສູງທຸລະກັນດານ, ເຂດຫ່າງໄກສອກຫຼີກ ກໍ່ຄືບັນດາຜະລິດຕະພັນ ທີ່ນັກລົງທຶນຫວຽດນາມ ທີ່ລົງທຶນຢູ່ບັນດາແຂວງຊາຍແດນຂອງລາວ ທີ່ຈະສົ່ງອອກໄປຫວຽດນາມ.
ນອກຈາກນັ້ນ, ຍັງມີລະບຽບການກ່ຽວກັບການຊຳລະເງິນ, ການກວດກາການພົກພາເງິນສົດ ຜ່ານຊາຍແດນ ກໍ່ຄືການຄຸ້ມຄອງການແຈ້ງເຂົ້າ-ອອກ ຂອງພົນລະເມືອງ, ພາຫະນະຂົນສົ່ງ, ການກັກກັນ, ກວດກາສິນຄ້າ ຂອງການຄ້າຊາຍແດນ ລາວ-ຫວຽດນາມ. ເພີ່ມທະວີການຊຸກຍູ້ການຄ້າ, ການລົງທຶນ ແລະ ທ່ອງທ່ຽວຂ້າມຊາຍແດນ, ສົ່ງເສີມການບໍລິການ ຊ່ວຍສະໜັບສະໜູນ ແລະ ອຳນວຍຄວາມສະດວກ ຕໍ່ການຄ້າຢູ່ດ່ານຊາຍແດນ; ສ້າງຕັ້ງຄະນະຊີ້ນຳການຄ້າຊາຍແດນ ລາວ-ຫວຽດນາມ, ສົ່ງເສີມໃຫ້ສ້າງຕັ້ງສະມາຄົມນັກທຸລະກິດ ເຄື່ອນໄຫວການຄ້າຊາຍແດນ ລາວ-ຫວຽດນາມ. ສັນຍາການຄ້າຊາຍແດນສະບັບນີ້ ບໍ່ສະເພາະເປັນພຽງການສ້າງພຶ້ນຖານ ທາງດ້ານກົດໝາຍ, ສ້າງກາລະໂອກາດ ໃຫ້ແກ່ການເພີ່ມທະວີການຮ່ວມມື ໃນຂົງເຂດການຄ້າ, ການລົງທຶນ ແລະ ການບໍລິການ ຢູ່ຂົງເຂດຊາຍແດນເທົ່ານັ້ນ ຍັງປະກອບສ່ວນຢ່າງຂັນແຂງ ເຂົ້າໃນວຽກງານຊຸກຍູ້ສາຍພົວພັນມິດຕະພາບພິເສດ ລະຫວ່າງ ລາວ-ຫວຽດນາມ ຕື່ມອີກ.
ໃນຫຼາຍປີຜ່ານມາ ການພົວພັນການຄ້າລະຫວ່າງ 2 ປະເທດ ສາມາດຍາດໄດ້ຜົນສຳເລັດຢ່າງເພິ່ງພໍໃຈ, ໂດຍສະເພາະ ແມ່ນຂົງເຂດການຄ້າ, ປີ 2014 ມູນຄ່າການສົ່ງອອກ-ນຳເຂົ້າ ບັນລຸໄດ້ 1,3 ຕື້ໂດລາສະຫະລັດ ທຽບໃສ່ປີ 2013 ເພີ່ມຂຶ້ນ 14,2%; ແລະໃນ 6 ເດືອນຕົ້ນປີ 2015 ສາມາດບັນລຸໄດ້ 686 ລ້ານໂດລາສະຫະລັດ. ເຖິງແນວໃດກໍ່ຕາມ ການພົວພັນການຄ້າ ຍັງບໍ່ທັນຂະຫຍາຍຕົວສົມຄູ່ກັບຄວາມອາດສາມາດຂອງ 2 ປະເທດ, ສິ່ງສຳຄັນ ໃນເງື່ອນໄຂ ລາວ ແລະ ຫວຽດນາມ ກຳລັງຈະກ້າວເຂົ້າສູ່ປະຊາຄົມເສດຖະກິດອາຊຽນ (AEC) ໃນທ້າຍປີ 2015 ນີ້. ເຊື່ອໝັ້ນວ່າ ສັນຍາການຄ້າຊາຍແດນນີ້ ຈະນຳຜົນປະໂຫຍດອັນໃຫຍ່ຫຼວງ ໃຫ້ກັບ 2 ປະເທດ ປະກອບສ່ວນຊຸກຍູ້ການຄ້າ 2 ຝ່າຍ, ສ້າງຄວາມເຂັ້ມແຂງໃນການເຊື່ອມໂຍງ ໃນຂົງເຂດອາຊຽນ ແລະ ຂົງເຂດບັນດາປະເທດລຸ່ມແມ່ນໍ້າຂອງ (GMS); ຊຸກຍູ້ການພົວພັນຮ່ວມມືຢ່າງແໜ້ນແຟ້ນ ລະຫວ່າງບັນດາແຂວງລຽບຕາມຊາຍແດນຂອງສອງປະເທດ ໃນຂົງເຂດເສດຖະກິດ, ການຄ້າ, ສັງຄົມ ແລະ ວັດທະນາທຳ, ປະກອບສ່ວນກໍ່ສ້າງເສັ້ນທາງຊາຍແດນຮ່ວມ ລາວ-ຫວຽດນາມ ໃຫ້ກາຍເປັນເສັ້ນທາງຊາຍແດນ ສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະ ການຂະຫຍາຍຕົວ ແບບຍືນຍົງ, ປະກອບສ່ວນເຂົ້າໃນ ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ຄວາມປອດໄພຂອງສັງຄົມ.
ໃນພິທີ, ທ່ານ ສົມສະຫວາດ ເລັ່ງສະຫວັດ ໄດ້ກ່າວບາງຕອນວ່າ: ສັນຍາການຄ້າຊາຍແດນສະບັບນີ້ ມີຄວາມໝາຍຄວາມສຳຄັນທາງປະຫວັດສາດ ຍ້ອນວ່ານັບແຕ່ມື້ສະຖາປະຖາ ສປປ ລາວ ມາຮອດປັດຈຸບັນ ເກືອບ 40 ປີ, ສອງປະເທດ ລາວ-ຫວຽດນາມ ຈຶ່ງໄດ້ເຊັນສັນຍາການຄ້າຊາຍແດນຮ່ວມກັນ; ເຊິ່ງຈະປະກອບສ່ວນເພີ່ມທະວີ ການພົວພັນການຄ້າສອງຝ່າຍ ແລະ ລັດຖະບານ ມອບໝາຍໃຫ້ກະຊວງອຸດສາຫະກຳ ແລະ ການຄ້າ ຈັດຕັ້ງປະຕິບັດໃຫ້ປະສົບຜົນສຳເລັດ, ນຳເອົາຜົນປະໂຫຍດມາສູ່ປະຊາຊົນສອງຊາດຢ່າງແທ້ຈິງ.
ພ້ອມນີ້, ທ່ານ ຫງວຽນ ຊວນ ຟຸກ ກໍ່ໄດ້ຕີລາຄາສູງ ແລະ ສະແດງຄວາມຊົມຊື່ນ ທີ່ເຫັນວ່າສາຍພົວພັນມິດຕະພາບ ແລະ ການຮ່ວມມືຮອບດ້ານ ຂອງສອງປະເທດ ນັບມື້ນັບມີການຂະຫຍາຍຕົວ ຢ່າງແຂງແຮງ, ພິເສດໃນປີ 2015 ນີ້ ບັນລຸໄດ້ໝາກຜົນເປັນທີ່ຈົດຈໍາ ແລະ ການລົງນາມໃນສັນຍາການຄ້າຊາຍແດນ ລະຫວ່າງສອງປະເທດໃນເທື່ອນີ້ ຈະເປັນນິຕິກຳທາງກົດໝາຍ ເພື່ອການເຄື່ອນໄຫວ ແລກປ່ຽນ ສິນຄ້າຜ່ານດ່ານຊາຍແດນ. ພ້ອມກັນນັ້ນ, ກໍ່ສ້າງຄວາມເປັນເອກະພາບ ໃນການແກ້ໄຂບາງບັນຫາ ຂອງການຄ້າຊາຍແດນ ແລະ ປະກອບສ່ວນ ເຂົ້າໃນການລົບລ້າງຄວາມທຸກຍາກ, ພັດທະນາເສດຖະກິດ-ສັງຄົມ ຂອງບັນດາແຂວງລຽບຊາຍແດນ ແລະ ຍົກມູນຄ່າການຄ້າສອງຝ່າຍໃຫ້ບັນລຸ 2 ຕື້ໂດລາ ໃນປີ 2015.
ໃນໂອກາດນີ້, ຕາງໜ້າໃຫ້ສອງພັກ ແລະ ສອງລັດຖະບານ ລາວ ແລະ ຫວຽດນາມ ທ່ານ ສົມສະຫວາດ ເລັ່ງສະຫວັດ ແລະ ທ່ານ ຫງວຽນ ຊວນ ຟຸກ ກໍ່ໄດ້ມອບຫຼຽນໄຊ, ຫຼຽນກາ ຂອງສອງພັກ, ສອງລັດ ໃຫ້ກົມກອງລວມໝູ່ ແລະ ບຸກຄົນ ທີ່ມີຜົນງານດີເດັ່ນ ປະກອບສ່ວນເຂົ້າໃນພະລາກິດ ສ້າງສາຍສຳພັນຂອງສອງປະເທດ ໃຫ້ນັບມື້ນັບເຕີບໃຫຍ່ຂະຫຍາຍຕົວຂຶ້ນຢ່າງບໍ່ຢຸດຢັ້ງ.
ແຫລ່ງ: ຫ້ອງວ່າການລັດຖະບານ 

No comments:

Post a Comment