January 31, 2016

ຊົມເຊີຍຜົນສຳເລັດ ກອງປະຊຸມໃຫຍ່ຜູ້ແທນ ພັກປະຊາຊົນປະຕິວັດລາວ ຄັ້ງທີ x


ພິທີຊົມເຊີຍຜົນສຳເລັດ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ X ຂອງພັກຢ່າງສຸດໃຈ ໃນວັນທີ 25 ມັງກອນ ຢູ່ທີ່ສະໂມສອນໃຫຍ່ຂອງແຂວງ ໄດ້ຈັດງານໂຮມຊຸມນຸມມິດຕິງຂື້ນ ໂດຍພາຍໃຕ້ເປັນປະທານຂອງທ່ານ ດຣ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງເຈົ້າແຂວງບໍລິຄຳໄຊ,​ ມີບັນດາທ່ານການນຳຂອງແຂວງ, ພະນັກງານຫຼັກແຫຼ່ງ, ພະແນກການຕ່າງໆພາຍໃນແຂວງເຂົ້າຮ່ວມຮັບຟັງ

ທ່ານ ດຣ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງເຈົ້າແຂວງບໍລິຄຳໄຊ ໄດ້ຂື້ນກ່າວບົດປາໃສ ທີ່ມີຄວາມໝາຍ ຄວາມສຳຄັນທາງດ້ານການເມືອງ ທີ່ຊາວແຂວງບໍລິຄຳໄຊ ສະເຫຼີມສະຫຼອງຜົນສຳເລັດກອງປະຊຸມໃຫຍ່ຄັ້ງທີ່ X ຂອງພັກປະຊາຊົນປະຕິບັດລາວ ທີ່ຫາກະສຳເລັດລົງ. ໃນໂອກາດສະຫງ່າລາສີ ຂໍແຈ້ງມາຍັງບັນດາສະຫາຍ ພະນັກງານ ທະຫານ ຕຳຫຼວດ ກຳມະກອນ ນັກຮຽນ ນັກສຶກສາ ແລະ ພໍ່ແມ່ປະຊາຊົນບັນດາເຜົ່າພາຍໃນແຂວງບໍລິຄຳໄຊ ຊາບທົ່ວເຖິ່ງກັນວ່າ: ກອງປະຊຸມໃຫຍ່ຄັ້ງທີ່ X ຂອງພັກປະຊາຊົນປະຕິບັດລາວ ໄດ້ໄຂຂື້ນໃນວັນທີ 18 ມັງກອນ 2016 ແລະ ສິ້ນສຸດລົງວັນທີ 22 ມັງກອນ 2016 ດ້ວຍໝາກຜົນສຳເລັດອັນສະຫງ່າງາມ ເຊິ່ງມີຜູ້ແທນສົມບູນເຂົ້າຮ່ວມທັງໝົດ 685 ສະຫາຍ, ຍິງ 83 ສະຫາຍ, ທີ່ມາຈາກບັນດາກະຊວງ, ທ້ອງຖິ່ນຮາກຖານຕ່າງໆ ທີ່ເປັນຕົວແທນໃຫ້ແກ່ສະມາຊິກພັກຈຳນວນ 268,437 ສະຫາຍ ໃນທົ່ວປະເທດ ພ້ອມກັນນັ້ນກໍ່ມີຕົວແທນຂອງພະນັກງານ, ສະມາຊິກພັກອາວຸໂສ ບຳນານ ແລະ ແຂກຖືກເຊີນ 408 ສະຫາຍ, ກອງປະຊຸມໃຫຍ່ຄັ້ງທີ່ X ຂອງພັກປະຊາຊົນປະຕິບັດລາວ ຄັ້ງນີ້ໄດ້ເປັນເອກະສັນ ຮັບຮອງເອົາບົດລາຍງານການເມືອງສະໃໝທີ່ X ເຊິ່ງໄດ້ທົບທວນຄືນຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ່ IX ຢ່າງສັງລວມ ແລະ ສາມາດບັນລຸໄດ້ໝາກຜົນຫຼາຍປະການ, ເຮັດໃຫ້ຂະແໜງການຕ່າງໆ, ບັນດາແຂວງປ່ຽນແປງຢ່າງຕັ້ງໜ້າ, ລະບົບປະຊາທິປະໄຕ ປະຊາຊົນລາວ ໄດ້ຮັບການບູລະນະ ປັບປຸງໃຫ້ເຂັ້ມແຂງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ການພັດທະນາເສດຖະກິດ ໄດ້ຮັບການປະຕິບັດຢ່າງມີໝາກຜົນ, ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂື້ນເປັນກ້າວໆ ປະຊາຊົນມີຄວາມອຸ່ນອຽນທູ່ນທ່ຽງ ເຊື້ອໝັ້ນຕໍ່ການນຳພາຂອງພັກ, ການເຕີບໃຫຍ່ທາງດ້ານເສດຖະກິດ 7,9%, ລາຍໄດ້ສະເລ່ຍຕໍ່ຫົວຄົນ 1,750 ໂດລາຕໍ່ປີ, ໝາກຜົນທີ່ຍາດມາໄດ້ນັ້ນແມ່ນໝາກຜົນອັນລວມຍອດແຫ່ງສະຕິປັນຍາ ແລະ ຄວາມສາມັກຄີພ້ອມພຽງກັນ, ຍ້ອນຄວາມບາກບັ່ນພາກພຽນພະຍາຍາມບຸກບືນສູ້ຊົນໃນທົ່ວພັກ ທົ່ວກອງທັບ ແລະ ປວງຊົນບັນດາເຜົ່າທົ່ວປະເທດ ທີ່ໄດ້ເຊີດຊູນ້ຳໃຈຮັກຊາດ ຮັກລະບອບໃໝ່ມີຄວາມເປັນເອກະພາບ ແລະ ເປັນເຈົ້າຕົນເອງໃນການສ້າງສາພັດທະນາ ບ້ານເກີດເມືອງນອນຂອງພວກເຮົາ ບໍ່ມີເວລາໃດທີ່ຈະເລີນຮຸ່ງເຮືອງຄືໃນເວລານີ້ ທີ່ພັກນຳພາ ຄຽງຄູ່ກັບຜົນສຳເລັດອັນພົ້ນເດັ່ນ ແລະ ເປັນພື້ນຖານດັ່ງກ່າວ ກອງປະຊຸມຍັງໄດ້ຍົກໃຫ້ເຫັນຂໍ້ຂາດຕົກບົກຜ່ອງ ຂໍ້ຄົງຄ້າງ ສາເຫດຕົ້ນຕໍຈຳນວນໜຶ່ງທີ່ພາໃຫ້ການຈັດຕັ້ງປະຕິບັດໃນຊຸມປີຜ່ານມາບໍ່ທັນໄດ້ຮັບຜົນສຳເລັດໃນບາງດ້ານ

ໃນກອງປະຊຸມໄດ້ເລືອກຕັ້ງຄະນະບໍລິຫານງານສູນກາງພັກສະໃໝທີ່ X  ປະກອບມີ 77 ສະຫາຍ, ໃນນັ້ນມີກຳມະການສູນກາງພັກສົມບູນ 69 ສະຫາຍ, ຍິງ 06 ສະຫາຍ, ກຳມະການສຳຮອງ 08 ສະຫາຍ, ຍິງ 03 ສະຫາຍ, ກອງປະຊຸມຄັ້ງປະຖົມມະລຶກ ໄດ້ຮັບຮອງເອົາສະຫາຍ ກົມການເມືອງສູນກາງພັກ 11 ສະຫາຍ ເລືອກເອົາ ສະຫາຍ ບຸນຍັງ ວໍລະຈິດ ເປັນເລຂາທິການໃຫຍ່ ພັກປະຊາຊົນປະຕິວັດລາວ, ທ່ານ ດຣ ບຸນທອງ ຈິດມະນີ ເປັນປະທານຄະນະກວດກາສູນກາງພັກ ແລະ ວຽກງານສຳຄັນອື່ນໆອີກ.

ຂໍ້ມູນຈາກ: http://www.bolikhamxay.gov.la/index.php/lo/2014-07-16-03-52-11/ຂ່າວປະຈຳວັນ/568-ຊົມເຊີຍຜົນສຳເລັດ-ກອງປະຊຸມໃຫຍ່ຜູ້ແທນ-ພັກປະຊາຊົນປະຕິວັດລາວ-ຄັ້ງທີ-x.html

No comments:

Post a Comment