December 9, 2015

ກອງປະຊຸມພົບປະຜູ້ຊົງຄຸນວຸດທິ ແຂວງບໍລິຄຳໄຊ

ກອງປະຊຸມພົບປະຜູ້ຊົງຄຸນວຸດທິ ປີ 2015 ຂອງແຂວງບໍລິຄຳໄຊ ໄດ້ຈັດຂຶ້ນໃນຕອນບ່າຍຂອງວັນທີ 3 ທັນວາ 2015 ທີ່ສະໂມສອນໃຫຍ່ຂອງແຂວງດັ່ງກ່າວ ໂດຍເປັນກຽດເຂົ້າຮ່ວມໃນພິທີມີ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ, ທ່ານ ດຣ. ກອງແກ້ວ ໄຊສົງຄາມ ເຈົ້າແຂວງໆບໍລິຄຳໄຊ ພ້ອມດ້ວຍບັນດາທ່ານ ຮອງເຈົ້າແຂວງ, ການນຳແຂວງ, ພະນັກງານຫຼັກແຫຼ່ງອາວຸໂສ, ພະນັກງານບຳນານ-ອະດີດການນຳແຂວງ, ເຖົ້າແກ່ແນວໂຮມ ແລະ ນັກຮຽນຮູ້-ນັກສຶກສາພາຍໃນແຂວງ ເຂົ້າຮ່ວມ.


ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ນຳເອົາຄວາມ ຢ້ຽມຢາມຖາມຂ່າວ ຈາກສູນກາງພັກ ແລະ ລັດຖະບານ ມາ ຍັງສະມາຊິກພັກ-ພະນັກງານອາວຸໂສ ບຳນານ, ເຖົ້າແກ່ແນວ ໂຮມ ແລະ ພໍ່ແມ່ປະຊາຊົນ ຊາວແຂວງບໍລິຄຳໄຊ. ພ້ອມນີ້, ທ່ານຍັງໄດ້ຍົກໃຫ້ເຫັນ ຄວາມໝາຍຄວາມສຳຄັນ ຂອງປະ ຫວັດສາດທີ່ມີມາຍາວນານຂອງແຂວງບໍລິຄຳໄຊ ທີ່ຄວນ ປົກປັກຮັກສາ ແລະ ຮຽບຮຽງໄວ້ ຢ່າງລະອຽດ ເພື່ອໃຫ້ ລູກຫຼານໄດ້ສຶກສາຄົ້ນຄວ້າ ແລະ ພ້ອມກັນເສີມຂະຫຍາຍ ມູນເຊື້ອ 40 ປີແຫ່ງການຈັດຕັ້ງປະຕິບັດ 2 ໜ້າທີ່ ຍຸດທະ ສາດ ຄື: ການປົກປັກຮັກສາ ແລະ ສ້າງສາພັດທະນາ ປະເທດຊາດ ເຊິ່ງນັບແຕ່ປະເທດຊາດໄດ້ຮັບການປົດປ່ອຍ ພັກ-ລັດ ກໍ່ໄດ້ນຳພາຮຳບາດແຜສົງຄາມ ແລະ ໃນໄລຍະຕໍ່ມາ ກໍ່ໄດ້ພ້ອມກັນຈັດຕັ້ງປະຕິບັດແນວທາງປ່ຽນແປງໃໝ່ ຈົນມາເຖິງປະຈຸບັນ ອັນມີຜົນສຳເລັດ ຫຼາຍດ້ານ ເປັນຕົ້ນ ໄດ້ເຮັດໃຫ້ລະບົບການເມືອງ ມີສະຖຽນລະພາບ ຢ່າງໜັກແໜ້ນເຂັ້ມແຂງ, ເຮັດໃຫ້ສັງຄົມມີຄວາມສະຫງົບປອດໄພ, ດ້ານເສດຖະກິດ ໄດ້ຮັບການພັດທະນາຢ່າງຫຼວງຫຼາຍ ໃນຂະແໜງການຕ່າງໆ ໂດຍສະເພາະ ດ້ານພື້ນຖານໂຄງລ່າງ ແລະ ການຂະຫຍາຍຕົວທາງດ້ານເສດຖະກິດ, ການຄ້າ ແລະ ການລົງທຶນ, ລາຍຮັບສະເລ່ຍຫຼາຍກວ່າ 1.800 ໂດລາສະຫະລັດຕໍ່ ຄົນຕໍ່ປີ, ພິເສດ ກໍ່ຍັງມີຜົນສຳເລັດຫຼາຍດ້ານ ທີ່ເປັນປະຫວັດສາດ ເຊັ່ນ: ສປປ ລາວ ໄດ້ມີດາວທຽມດວງທຳອິດ ທີ່ໄດ້ຍິງຂຶ້ນສູ່ວົງໂຄຈອນ ໃນທ້າຍເດືອນພະຈິກ 2015 ທີ່ຜ່ານມາ ແລະ ໄດ້ວາງສິລາລືກໂຄງການທາງລົດໄຟ ລາວ-ຈີນ ໃນວັນທີ 2 ທັນວາ 2015. ພ້ອມນີ້, ກໍ່ຍັງໄດ້ວາງຄາດໝາຍໄວ້ວ່າ ຈະນຳພາປະເທດຫຼຸດພົ້ນອອກຈາກປະເທດດ້ອຍພັດ ທະນາໃນປີ 2020.
ໃນໂອກາດດຽວກັນ ທ່ານ ສົມສະຫວາດ ເລັ່ງສະຫວັດ ກໍ່ໄດ້ເນັ້ນໃຫ້ອຳນາດການປົກຄອງແຂວງ ແລະ ປະຊາຊົນພາຍໃນແຂວງ ຕ້ອງໄດ້ເພີ່ມທະວີຄວາມສາມັກຄີພາຍໃນແຂວງ ເວົ້າສະເພາະ ກໍ່ແມ່ນຄວາມສາມັກຄີລະຫວ່າງປະຊາ ຊົນບັນດາເຜົ່າ ແລະ ພາຍໃນເຜົ່າ, ດ້ານການພັດທະນາເສດຖະກິດຂອງແຂວງ ກໍ່ຕ້ອງໄດ້ສູ້ຊົນເພື່ອສ້າງລາຍຮັບໃຫ້ປະຊາຊົນ ໃຫ້ບັນລຸ 2.500 $ ຕໍ່ຫົວຄົນ ໃນປີ 2020; ສໍາລັບການທ່ອງທ່ຽວ ໃນເງື່ອນໄຂການເຊື່ອມໂຍງ ຕ້ອງໄດ້ເອົາໃຈໃສ່ສ້າງ ແຜນພັດທະນາບຸກຄະລາກອນ ຕາມຄວາມຕ້ອງການ ແລະ ສະພາບຕົວຈິງຂອງແຂວງ ເພື່ອຕອບສະໜອງໃຫ້ແກ່ ການພັດທະນາແຂວງທີ່ໄດ້ວາງໄວ້; ດ້ານການພົວພັນຕ່າງປະເທດ ໂດຍສະເພາະ ການກ້າວເຂົ້າເປັນປະຊາ ຄົມເສດຖະ ກິດອາຊຽນ ໃນວັນທີ 31/12/2105ນີ້ ຕ້ອງໄດ້ສົມທົບກັບກະຊວງທີ່ກ່ຽວຂ້ອງ ເພື່ອໃຫ້ມີການເຜີຍແຜ່ຢ່າງລະອຽດ ແລະ ເພື່ອໃຫ້ກຽມຄວາມພ້ອມທຸກດ້ານຂອງການເຊື່ອມໂຍງ. ພ້ອມດຽວກັນນີ້ ທ່ານຮອງນາຍົກລັດຖະມົນຕີ ຍັງໄດ້ຮຽກຮ້ອງໃຫ້ ບັນດາສະມາຊິກພັກ-ພະນັກງານ ໂດຍສະເພາະ ການນຳແຕ່ລະຂັ້ນ ຈົ່ງໄດ້ເອົາໃຈໃສ່ສຶກສາຄົ້ນຄວ້າ, ຮ່ຳຮຽນເອົາຄຸນສົມບັດ ສິນທຳປະຕິວັດ ຂອງປະທານ ໄກສອນ ພົມວິຫານ, ດຳລົງຊີວິດແບບປອດໃສຂາວສະອາດ, ຈັດຕັ້ງປະຕິບັດຂໍ້ແຂ່ງ ຂັນຮັກຊາດພັດທະນາ. ພ້ອມນີ້, ກໍ່ຕ້ອງເປັນແບບຢ່າງ ແຫ່ງຄວາມສາມັກຄີ ແລະ ເປັນເອກະພາບກັນ ໃນທຸກຂົງເຂດວຽກ ງານບົນຫຼັກການຂອງພັກ.


No comments:

Post a Comment